អ៊ីរ៉ង់ បានប្រាប់ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃចន្ទ (១៧ មីនា) ថា ប្រធានាធិបតីសហរដ្ឋអាមេរិក លោក Donald Trump និងក្រុមមន្ត្រីសហរដ្ឋអាមេរិកផ្សេងទៀត បានធ្វើ "សេចក្តីថ្លែងការណ៍ដែលមិនប្រុងប្រយ័ត្ន និងបង្ករឿង" ទាក់ទងនឹងក្រុមប្រដាប់អាវុធយេម៉ែន ហ៊ួទី ដែលបង្កើន "ការចោទប្រកាន់ដោយគ្មានមូលដ្ឋាន" និងគំរាមកំហែងការប្រើប្រាស់កម្លាំងប្រឆាំងនឹងទីក្រុងតេអេរ៉ង់។

ឯកអគ្គរដ្ឋទូតអ៊ីរ៉ង់ ប្រចាំអង្គការសហប្រជាជាតិ លោក Amir Saeid Iravani បានសរសេរនៅក្នុងលិខិតមួយថា "អ៊ីរ៉ង់ បដិសេធយ៉ាងដាច់អហង្ការ និងជាដាច់ខាតនូវការចោទប្រកាន់ណាមួយលើការរំលោភសេចក្ដីសម្រេចរបស់ក្រុមប្រឹក្សាសន្តិសុខ ពាក់ព័ន្ធលើការហាមឃាត់អាវុធនៅក្នុងប្រទេសយេម៉ែន ឬការជាប់ពាក់ព័ន្ធក្នុងសកម្មភាពបង្កអស្ថិរភាពណាមួយនៅក្នុងតំបន់"។

លោក Trump កាលពីថ្ងៃចន្ទ បានលើកឡើងថា លោកនឹងចាត់ទុកអ៊ីរ៉ង់ ថាជាអ្នកទទួលខុសត្រូវចំពោះការវាយប្រហារណាមួយដែលធ្វើឡើងដោយក្រុមហ៊ួទី ដែលខ្លួនគាំទ្រនៅយេម៉ែន ដោយព្រមានថា អ៊ីរ៉ង់នឹងទទួលរងផលវិបាក ហើយផលវិបាកទាំងនោះនឹងធ្ងន់ធ្ងរយ៉ាងខ្លាំង។ សេតវិមានបញ្ជាក់ថា សាររបស់លោក Trump ទៅកាន់អ៊ីរ៉ង់ ជារឿងម៉ឺងម៉ាត់ មិនមែនលេងសើចនោះទេ។

ក្រុមហ៊ួទី ជាចលនាប្រដាប់អាវុធមួយ ដែលបានគ្រប់គ្រងផ្នែកដ៏ធំនៅយេម៉ែន បើទោះបីជាមានការទម្លាក់គ្រាប់បែកជិតមួយទសវត្សរ៍ ដែលដឹកនាំដោយអារ៉ាប៊ីសាអ៊ូឌីតដើម្បីកម្ចាត់ក្រុមនេះក៏ដោយ ហើយពួកសកម្មប្រយុទ្ធទាំងនេះបានចាប់ផ្តើមការវាយប្រហារជាច្រើនលើនាវានៅឆ្នេរសមុទ្ររបស់ខ្លួនចាប់តាំងពីខែវិច្ឆិកា ឆ្នាំ២០២៣ ដោយរំខានដល់ពាណិជ្ជកម្មពិភពលោក៕