គម្រោងសហប្រតិបត្តិការ ចិន-កម្ពុជា-យូនីសេហ្វ ត្រូវបានប្រកាសដាក់ឱ្យអនុវត្ត ដើម្បី​ពង្រីក​សេវា​ទឹក​ស្អាត និងអនាម័យដែលធន់ នឹងអាកាសធាតុនៅកម្ពុជា, គំនិតផ្តួចផ្តើម​នេះ​គឺ​ជា​ការ​ប្តេជ្ញា​ចិត្ត​រួម​គ្នា ដើម្បីធានាដល់សហគមន៍ដែលងាយរងគ្រោះបំផុត មានលទ្ធភាព ទទួលបាន​សេវា​ទឹក​ស្អាត ​និងអនាម័យដែលមានសុវត្ថិភាព។

ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើក​ឡើ​​ងនៅ​ក្នុងពិធីប្រកាសដាក់ ឱ្យអនុវត្តគម្រោងទឹកស្អាត និងអនាម័យ​ដែល​ធន់នឹង​អាកាស​ធាតុ​កម្ពុជា នៅល្ងាចថ្ងៃទី១៧ ខែមីនា ឆ្នាំ២០២៥ នេះថា ប្រទេសកម្ពុជា បានបោះជំហាន​ទៅ​មុខ​គួរ​ឱ្យ​កត់​សម្គាល់ ក្នុងការពង្រីកលទ្ធភាពទទួលបានសេវាទឹកស្អាត និងអនាម័យឆ្ពោះ ទៅការ​សម្រេច​បាន​នូវគោលដៅអភិវឌ្ឍន៍ប្រកបដោយចីរភាពកម្ពុជា (CSDG) ៦.១ និង ៦.២។ គោល​ដៅ​នេះ​ត្រូវបានកំណត់ ដោយធានាថា មានទឹក បរិភោគ ដែលមានសុវត្ថិភាព និងថ្លៃសមរម្យ និង​មាន​សេវា​អនាម័យសម្រាប់ប្រជាជនទាំងអស់ត្រឹមឆ្នាំ២០៣០ ដោយផ្តល់អាទិភាព ដល់ស្ត្រី ក្មេង​ស្រី និងប្រជាពលរដ្ឋងាយរងគ្រោះ។

គម្រោង​នៃកិច្ចសហប្រតិបត្តិការនេះ ក្រសួងចំនួន ៣ របស់កម្ពុជា គឺក្រសួងឧស្សាហកម្ម វិទ្យា​សាស្ត្រ បច្ចេកវិទ្យា និងនវានុវត្តន៍ ក្រសួងអភិវឌ្ឍន៍ជនបទ និងក្រសួងសាធារណការ និង​ដឹក​ជញ្ជូន គឺជាអង្គភាពអនុវត្តគម្រោង ដោយទទួលបានជំនួយបច្ចេកទេស និង ហិរញ្ញវត្ថុ ពីក្រសួង​ធន​ធាន​ទឹកនៃសាធារណៈរដ្ឋប្រជាមានិតចិន និងអង្គការយូនីសេហ្វ ប្រចាំប្រទេសចិន។

ឯកឧត្តម Li Guoying រដ្ឋមន្ត្រីក្រសួងធនធានទឹកនៃសាធារណៈរដ្ឋប្រជាមានិតចិន បានលើក​ឡើង​ថា ប្រទេសចិនបានត្រៀម ខ្លួនជាស្រេច ក្នុងការសហការជាមួយកម្ពុជា អង្គការយូនីសេហ្វ ប្រទេស​ផ្សេងៗ និងអង្គការអន្តរជាតិនានា ដើម្បីពង្រឹងការផ្លាស់ប្តូរ និងកិច្ច​សហ​ប្រតិបត្តិការ​ក្នុង​គោល​នយោបាយអភិបាលកិច្ច ការចែករំលែកបទពិសោធន៍ និងបច្ចេកវិទ្យាគ្រប់គ្រងទឹក។ តាមរយៈកិច្ច សហការនេះ យើងនឹងខិតខំសម្រេចឱ្យបាននូវគោលដៅទឹក នៃរបៀបវារៈ​អភិវឌ្ឍន៍​ប្រកប​ដោយ​ចីរភាពឆ្នាំ២០៣០ របស់អង្គការ សហប្រជាជាតិ និងកសាងសហគមន៍ចិន-កម្ពុជា ជា​មួយ​នឹងអនាគតរួមគ្នាក្នុងយុគសម័យថ្មី។

លោកបណ្ឌិត Anirban Chatterjee អនុប្រធានអង្គការយូនីសេហ្វ ប្រចាំនៅកម្ពុជា លើក​ឡើង​ផង​ដែរ​ថា កុមារគឺជាអ្នកទទួល ខុសត្រូវតិចតួចបំផុតចំពោះការប្រែប្រួលអាកាសធាតុ ប៉ុន្តែ​ពួក​គាត់​ជា​អ្នក​រងផលប៉ះពាល់ខ្លាំងជាងគេ ពីការប្រែប្រួលអាកាសធាតុ និង វិបត្តិ​ទាក់​ទង​នឹង​អាកាស​ធាតុ​នានា បញ្ហានេះយើងធ្វើការរួមគ្នា ជួយឱ្យកុមារគ្រប់រូបទទួលបានសិទ្ធិក្នុងការរស់ នៅ​ក្នុង​បរិស្ថានដែលមានសុវត្ថិភាព ស្អាត និងមានសុខភាពល្អនៅថ្ងៃអនាគត។

សូមបញ្ជាក់ថា កម្មវិធីសហប្រតិបត្តិការនេះក៏មានគោលគោលដៅនាំយកបច្ចេកវិទ្យាទំនើបថ្មីៗ គំរូ​អាជីវ​កម្ម​និរន្តរភាព និងដំណោះ ស្រាយដែលមានប្រសិទ្ធភាពខ្ពស់ ដើម្បី​ពង្រឹង​ភាព​ធន់​នៃ​សេវា​ទឹក​ស្អាត និងអនាម័យដោយលើកកម្ពស់សុខមាលភាពរបស់សហគមន៍ សាលារៀន និងមូលដ្ឋាន​សុខភិបាល នៅក្នុងតំបន់គោលដៅ ព្រមទាំងជំរុញការអភិវឌ្ឍប្រកបដោយចីរភាព ភាពធន់ និង​បរិយាបន្ន​៕ អត្ថបទ៖ សុន រ៉ាឌី