យោធាអ៊ីស្រាអែលបាននិយាយកាលពីថ្ងៃចន្ទ ថា ខ្លួនបានវាយប្រហារលើទីតាំងយោធាជាច្រើនកន្លែងនៅភាគខាងត្បូងប្រទេសស៊ីរី ខណៈប្រព័ន្ធផ្សព្វផ្សាយរដ្ឋស៊ីរីរាយការណ៍ថា មានមនុស្សពីរនាក់បានស្លាប់នៅក្នុងការវាយប្រហាររបស់អ៊ីស្រាអែល នៅជិតទីក្រុង Daraa ភាគខាងត្បូង។

សេចក្តីថ្លែងការណ៍របស់កងទ័ពបាននិយាយថា បច្ចុប្បន្នកងកម្លាំងការពារអ៊ីស្រាអែល កំពុងវាយប្រហារគោលដៅយោធានៅភាគខាងត្បូងប្រទេសស៊ីរី រួមទាំងមជ្ឈមណ្ឌលទីបញ្ជាការ និងទីតាំងយោធាដែលមានអាវុធ និងរថយន្តយោធាច្រើនកន្លែង ជាកម្មសិទ្ធិរបស់របបចាស់ស៊ីរី។

សេចក្តីថ្លែងការរណ៍និយាយថា «វត្តមាននៃទ្រព្យយោធានៅភាគខាងត្បូងប្រទេសស៊ីរី បង្កការគំរាមកំហែងដល់រដ្ឋអ៊ីស្រាអែល» ហើយយោធា នឹងមិនអនុញ្ញាតឱ្យមានវត្តមាននៃការគំរាមកំហែងផ្នែកយោធានៅភាគខាងត្បូងស៊ីរីដែលនឹងធ្វើប្រតិបត្តិការប្រឆាំងខ្លួនឡើយ។

ទីភ្នាក់ងារសារព័ត៌មានរដ្ឋស៊ីរី SANA បានរាយការណ៍ថា ជនស៊ីវិលពីរនាក់បានស្លាប់ និង១៩ នាក់ផ្សេងទៀតបានរងរបួស នៅក្នុងការវាយប្រហារតាមអាកាសរបស់អ៊ីស្រាអែលនៅជាយក្រុង Daraa។ ក្រុមឃ្លាំមើលសិទ្ធិមនុស្សស៊ីរី បាននិយាយថា អ៊ីស្រាអែលបានកំណត់គោលដៅលើទីតាំងយោធាមួយកន្លែង ដែលធ្លាប់ជាកម្មសិទ្ធិរបស់កងទ័ពរបស់ប្រធានាធិបតី Bashar al-Assad ដែលត្រូវបានបណ្តេញចេញពីតំណែង ប៉ុន្តែបច្ចុប្បន្នត្រូវបានប្រើប្រាស់ដោយកងកម្លាំងរបស់អាជ្ញាធរថ្មីប្រទេសស៊ីរី។