រដ្ឋាភិបាលចក្រភពអង់គ្លេស បាននិយាយកាលពីថ្ងៃចន្ទថា ប្រទេសធំៗជាច្រើន នឹងផ្តល់កងទ័ពដើម្បីការពារបទឈប់បាញ់ណាមួយនៅក្នុងប្រទេសអ៊ុយក្រែន ជាផ្នែកនៃអ្វីដែលគេហៅថាក្រុមចម្រុះនៃឆន្ទៈ។ អ្នកនាំពាក្យរបស់នាយករដ្ឋមន្ត្រី លោក Keir Starmer បាននិយាយទៅកាន់អ្នកសារព័ត៌មានថា ចក្រភពអង់គ្លេស រំពឹងថា «ប្រទេសជាង៣០» នឹងរួមចំណែកដល់ក្រុមចម្រុះនេះក្នុងទម្រង់មួយចំនួន។

អ្នកនាំពាក្យរូបនេះបាននិយាយថា «នាយករដ្ឋមន្ត្រី បាននិយាយកាលពីចុងសប្តាហ៍ថា នឹងមានសមត្ថភាពផ្សេងៗគ្នាមកពីប្រទេសខុសគ្នា ប៉ុន្តែទាំងនេះគឺជាកិច្ចពិភាក្សាប្រតិបត្តិការដែលកំពុងបន្ត ទាក់ទងទៅនឹងអ្វីដែលក្រុមចម្រុះនៃឆន្ទៈ នឹងអាចផ្តល់ឱ្យបាន»។

លោកបាននិយាយបន្ថែមថា «យើងរំពឹងថា ប្រទេសជាង៣០នឹងចូលរួម។ ជាក់ស្តែង ការរួមចំណែកសមត្ថភាពនឹងប្រែប្រួល ប៉ុន្តែនេះនឹងក្លាយជាកម្លាំងដ៏សំខាន់មួយ ដោយប្រទេសមួយចំនួនធំនឹងផ្តល់កងទ័ព និងការរួមចំណែកក្នុងក្រុមដ៍ធំ តាមមធ្យោបាយផ្សេងៗ» ។

លោក Starmer និងប្រធានាធិបតីបារាំង លោក Emmanuel Macron បាននិងកំពុងដឹកនាំកិច្ចខិតខំប្រឹងប្រែងដើម្បីបង្កើតក្រុមចម្រុះ ចាប់តាំងពីប្រធានាធិបតីសហរដ្ឋអាមេរិក លោក Donald Trump បាន ចរចាដោយផ្ទាល់ជាមួយរុស្ស៊ី កាលពីខែមុន ដើម្បីបញ្ចប់សង្គ្រាម។ ពួកគេនិយាយថា ក្រុមចម្រុះនេះគឺចាំបាច់រួមជាមួយនឹងការគាំទ្ររបស់សហរដ្ឋអាមេរិក ដើម្បីផ្តល់ការធានាសន្តិសុខដល់អ៊ុយក្រែន និងរារាំងប្រធានាធិបតីរុស្ស៊ី លោក Vladimir Putin ពីការរំលោភលើបទឈប់បាញ់ណាមួយ។