យោងតាមអាជ្ញាធរក្នុងតំបន់បានឱ្យដឹងថា មនុស្ស៧នាក់ រួមមានទាំងអនីតិជនពីរនាក់ បានស្លាប់ និង៦ នាក់ផ្សេងទៀតបានរងរបួស នៅក្នុងការវាយប្រហារប្រដាប់អាវុធ នៅខាងក្រៅរោងចក្រផលិតស្រាបៀរមួយកន្លែងក្នុងទីក្រុង Salamanca រដ្ឋ Guanajuato ប្រទេសម៉ិកស៊ិក។

សាក្សី បានរាយការណ៍ថា ក្រុមជនប្រដាប់អាវុធបានបើកការបាញ់ប្រហារចេញពីរថយន្ត សំដៅទៅលើក្រុមយុវជនមួយក្រុម ដែលបានមកជួបជុំគ្នា នៅខាងក្រៅអគារ។

អ្នកស្រុក Samalanca បានសម្តែងការសោកស្ដាយ និងបានអំពាវនាវឱ្យបង្កើនកិច្ចអន្តរាគមន៍ពីរដ្ឋាភិបាល ដើម្បីទប់ស្កាត់សោកនាដកម្មបែបនេះ។

យោងតាមប្រព័ន្ធផ្សព្វផ្សាយក្នុងស្រុកបានឲ្យដឹងថា អ្នកស្រុកបាននិយាយថា ជនរងគ្រោះពុំមានទំនាក់ទំនងជាមួយក្រុមឧក្រិដ្ឋជនទាំងនោះទេ។

អាជ្ញាធរបានបើកការស៊ើបអង្កេត ប៉ុន្តែនៅមិនមានការចាប់ខ្លួនជនណាម្នាក់នៅឡើយ។