លោកប្រធានាធិបតីអាមេរិក Donald Trump បានចុះហត្ថលេខាលើក្រឹត្យមួយកាលពីចុងសប្តាហ៍ ដោយលុបបំបាត់ទីភ្នាក់ងារសហព័ន្ធដែលជាបណ្ដាញមេគ្រប់គ្រងការផ្សាយរបស់ប្រព័ន្ធផ្សព្វផ្សាយ សំឡេងសហរដ្ឋអាមេរិក ឬហៅថា VOA ដែលបានផ្សាយព័ត៌មានអស់ពេលជាង ៨០ឆ្នាំមកហើយ ចេញពីបណ្ដាប្រទេសជាច្រើន ដែលធ្វើឱ្យ VOA ត្រូវបង្ខំចិត្តបិទដំណើរការ។

ប៉ុន្មានម៉ោងបន្ទាប់ពីលោក Trump បានចុះហត្ថលេខាលើក្រឹត្យមួយកាលពីថ្ងៃសុក្រសប្ដាហ៍មុន ដែលបញ្ជាឱ្យលុបបំបាត់ទីភ្នាក់ងារសហរដ្ឋអាមេរិកសម្រាប់ប្រព័ន្ធផ្សព្វផ្សាយសកលរួច អ្នកសារព័ត៌មាន នាយកប្រតិបត្តិ និងបុគ្គលិកជាច្រើននៅទីស្នាក់ការកណ្តាលរបស់ទីក្រុងវ៉ាស៊ីនតោន ត្រូវបានជូនដំណឹងពីការបញ្ឈប់ការងារដោយផ្ដល់ប្រាក់សំណងផ្សេងៗ នេះបើតាមសារព័ត៌មានក្នុងស្រុក។

កាលពីថ្ងៃសៅរ៍ចុងសប្ដាហ៍ សេតវិមានបានចេញសេចក្តីប្រកាសមួយ ដែលមានចំណងជើងថា "សារព័ត៌មានសំឡេងជ្រុលនិយមរបស់អាមេរិក" ដែលបានលើកឡើងពីការអះអាងជាច្រើនដែលចោទប្រកាន់ VOA ថាបង្ហាញ "ភាពលំអៀងឆ្វេងនិយម ស្របតាមប្រព័ន្ធផ្សព្វផ្សាយជាតិដែលប្រកាន់បក្សពួក"។

សមាជិកបុគ្គលិកបានរាយការណ៍ភ្លាមៗថាបាត់បង់សិទ្ធិចូលប្រើអ៊ីមែលការងារ និងប្រព័ន្ធទំនាក់ទំនងខាងក្នុងរបស់ពួកគេ។ បុគ្គលិកពេញម៉ោងជាង ១.០០០នាក់មកពី VOA និង OCB ដែលប្រតិបត្តិការវិទ្យុ និងទូរទស្សន៍ ត្រូវបានរងផលប៉ះពាល់។ គិតត្រឹមថ្ងៃសៅរ៍ចុងសប្ដាហ៍ ការផ្សាយរបស់វិទ្យុ VOA ក្នុងតំបន់អាស៊ី និងមជ្ឈិមបូព៌ាបានស្ងាត់ជ្រាប ឬចាក់ផ្សាយតែតន្ត្រីប៉ុណ្ណោះ នេះបើយោងតាមកាសែត New York Times៕