ក្រុមឧតុនិយមនៅស្ថាប័នព្យាករអាកាសធាតុ AccuWeather បានព្រមានថា បន្ទាប់ពីអាកាសធាតុដ៏បំផ្លិចបំផ្លាញ និងព្យុះភ្លៀងដ៏កាចសាហាវកាលពីចុងសប្តាហ៍នៅស្ទើរទូទាំងសហរដ្ឋអាមេរិក ដែលបានសម្លាប់មនុស្សរាប់សិបនាក់រួច ពេលនេះការគំរាមកំហែងកាន់តែអាក្រក់រយៈពេលជាច្រើនថ្ងៃ នឹងកើតមានក្នុងពាក់កណ្តាលសប្តាហ៍នេះ នៅតាមតំបន់ភាគកណ្ដាលរបស់អាមេរិក ហើយអាចឆ្ពោះទៅផ្នែកខ្លះនៃឆ្នេរភាគខាងកើតមុនថ្ងៃសុក្រខាងមុខ។

ដូចកាលពីចុងសប្តាហ៍មុនដែរ ព្យុះថ្មីក្នុងសប្តាហ៍នេះនឹងនាំមកនូវគ្រោះថ្នាក់ជាច្រើន រាប់ចាប់ពីខ្យល់បក់បោកនាំយកធូលី និងហានិភ័យចំហេះព្រៃ រហូតទៅដល់ព្រិលធ្លាក់ និងព្យុះព្រិល ព្រមទាំងផ្គររន្ទះខ្លាំង។

គួរឱ្យដឹងថា គ្រោះថ្នាក់ជាង ១.០០០ករណី នៃអាកាសធាតុធ្ងន់ធ្ងរ ដែលភាគច្រើនជាខ្យល់កន្រ្តាក់ចាប់ពីថ្ងៃសុក្រ ដល់ថ្ងៃអាទិត្យកាលពីចុងសប្ដាហ៍ រួមទាំងព្យុះកួចជាង ៩០ករណី ត្រូវបានរាយការណ៍ និងកំពុងស៊ើបអង្កេត ហើយព្យុះនោះបានឆក់យកជីវិតមនុស្សយ៉ាងតិច ៤០នាក់ និងរាប់សិបនាក់ផ្សេងទៀតរងរបួស។

មានភាពស្រដៀងគ្នាមួយចំនួនរវាងព្រឹត្តិការណ៍អាកាសធាតុទាំងពីរ ដោយព្យុះថ្មីនៅសប្តាហ៍នេះនឹងរំកិលចេញពីតំបន់ភ្នំ ទៅវាយប្រហារវាលទំនាប រួចនឹងនឹងបោកបក់ចូលទៅក្នុងខ្យល់ក្តៅហើយសើមនៅឈូងសមុទ្រ ហើយឥទ្ធិពលនៃព្យុះកម្រិតធ្ងន់ធ្ងរនឹងជះទៅលើប្រជាជននៅតាមតំបន់ឆ្នេរ។ ថ្វីត្បិតតែព្យុះសប្ដាហ៍នេះមានកម្លាំងខ្លាំង ប៉ុន្តែក៏មិនខ្លាំងក្លាដូចប្រព័ន្ធអាកាសធាតុកាលពីចុងសប្តាហ៍មុននោះដែរ៕