អាជ្ញាធរបាននិយាយថា យន្តហោះខ្នាតតូចមួយគ្រឿងបានធ្លាក់នៅឆ្នេរសមុទ្រការ៉ាអ៊ីបនៃប្រទេសហុងឌុយរ៉ាស កាលពីយប់ថ្ងៃចន្ទ (១៧ មីនា) ប៉ុន្មាននាទីប៉ុណ្ណោះបន្ទាប់ពីហោះចេញពីកោះ Roatan ដោយបានសម្លាប់មនុស្ស ៧នាក់ ខណៈ ១០នាក់ផ្សេងទៀតត្រូវបានសង្រ្គោះចេញពីបំណែកបែកបាក់។

យន្តហោះ Jetstream ដំណើរការដោយក្រុមហ៊ុនអាកាសចរណ៍ ហុងឌុយរ៉ាស អ៊ែរឡាញ Lanhsa បានដឹកមនុស្សសរុប ១៧នាក់ ដែលមានអ្នកដំណើរ ១៤នាក់ និងបុគ្គលិក ៣នាក់ នេះបើយោងតាមរដ្ឋមន្ត្រីដឹកជញ្ជូនរបស់ប្រទេស ដែលបាននិយាយថា បំណែកយន្តហោះត្រូវបានរកឃើញប្រហែល ១គីឡូម៉ែត្រពីឆ្នេរសមុទ្ររបស់កោះ Roatan។

យន្តហោះនេះគ្រោងនឹងហោះហើរទៅកាន់អាកាសយានដ្ឋាន La Ceiba នៅលើដីគោក ហុងឌុយរ៉ាស។ ប្រធានក្រុមពន្លត់អគ្គិភ័យកោះ Roatan លោក Franklin Borjas បានបញ្ជាក់ពីចំនួនអ្នកស្លាប់ ៧នាក់នោះ ខណៈទាំងនគរបាល និងមន្ត្រីពន្លត់អគ្គីភ័យ បានបញ្ជាក់ថា កិច្ចខិតខំប្រឹងប្រែងជួយសង្គ្រោះកំពុងដំណើរការ។ មូលហេតុនៃការធ្លាក់យន្តហោះនេះមិនទាន់ដឹងច្បាស់នៅឡើយទេ។

Roatan គឺជាកោះដ៏ធំបំផុតនៃប្រជុំកោះ Bay នៅជិតឆ្នេរសមុទ្រហុងឌុយរ៉ាស ហើយជាកន្លែងទាក់ទាញទេសចរណ៍ដ៏ពេញនិយម និងល្បីល្បាញមួយដោយសារផ្កាថ្មដ៏ស្រស់ស្អាត និងរស់រវើករបស់ខ្លួន៕