សហភាពអឺរ៉ុប (EU) បានដាក់ទណ្ឌកម្មមនុស្ស ៩នាក់ និងរោងចក្រចម្រាញ់មាសកាលពីថ្ងៃចន្ទ ពាក់ព័ន្ធនឹងការបះបោរគាំទ្រដោយប្រទេសរ៉្វាន់ដា នៅភាគខាងកើតនៃសាធារណរដ្ឋប្រជាធិបតេយ្យកុងហ្គោ មួយថ្ងៃមុនកិច្ចចរចាសន្តិភាព ដែលគ្រោងធ្វើឡើងនៅប្រទេសអង់ហ្គោឡា រវាងក្រុមឧទ្ទាម M23 និងរដ្ឋាភិបាលកុងហ្គោ។

ទណ្ឌកម្មបានកំណត់គោលដៅទៅលើមេដឹកនាំនយោបាយរបស់ក្រុមឧទ្ទាម M23 លោក Bertrand Bisimwa និងមេបញ្ជាការកងទ័ពរ្វ៉ាន់ដា។

ទណ្ឌកម្មទាំងនេះ ក៏ត្រូវបានអនុវត្តចំពោះនាយកប្រតិបត្តិនៃក្រុមហ៊ុន Rwanda Mines, Petroleum and Gas Board និងរោងចក្រចម្រាញ់មាស Gasabo នៅក្នុងទីក្រុង Kigali ដែលសហភាពអឺរ៉ុបបានចោទប្រកាន់ ពីបទនាំចេញធនធានធម្មជាតិដោយខុសច្បាប់ពីប្រទេសកុងហ្គោ។

ចំពេលមានការយុទ្ធនាការនៃសកម្មភាពការទូត សម្ព័ន្ធឧទ្ទាម ដែលរួមមាន M23 បានបញ្ជាក់ថា ខ្លួននឹងបញ្ជូនគណៈប្រតិភូ ដែលមានសមាជិក ៥រូប ទៅកិច្ចចរចា នៅថ្ងៃអង្គារនេះ នៅទីក្រុង Luanda ដែលអាចជាការចរចាដោយផ្ទាល់លើកដំបូងរបស់ក្រុមឧទ្ទាម M23 ជាមួយរដ្ឋាភិបាលកុងហ្គោ។

ការិយាល័យរបស់ប្រធានាធិបតីកុងហ្គោលោក Felix Tshisekedi បានឲ្យដឹងកាលពីថ្ងៃអាទិត្យថា រដ្ឋធានី Kinshasa នឹងបញ្ជូនអ្នកតំណាងទៅកាន់ទីក្រុង Luanda ដោយបានច្រានចោលការសន្យាដ៏យូរអង្វែងរបស់រដ្ឋាភិបាលថា នឹងមិនចរចាជាមួយក្រុមដែលខ្លួនបានចាត់ទុកថា គ្រាន់តែជាផ្នែកជួរមុខសម្រាប់រដ្ឋា  ភិបាលរ្វ៉ាន់ដាប៉ុណ្ណោះ។