ប្រទេសអង់គ្លេស និងសហភាពអឺរ៉ុប (EU) នឹងបង្កើនសម្ពាធលើប្រទេសរុស្ស៊ី និងជំរុញគំនិតផ្តួចផ្តើមការពារជាតិ ខណៈដែលប្រធានគោលនយោបាយការបរទេសរបស់ប្លុកនេះ គឺលោកស្រី Kaja Kallas ជួបជាមួយរដ្ឋមន្ត្រីការបរទេសអង់គ្លេស លោក David Lammy និងរដ្ឋមន្ត្រីការពារជាតិ លោក John Healey នៅទីក្រុងឡុងដ្រ៍ ប្រទេសអង់គ្លេស នាថ្ងៃអង្គារ (ទី១៨ ខែមីនា) នេះ។

កាលពីថ្ងៃចន្ទ (ទី១៧ ខែមីនា) ការិយាល័យបរទេស សហធន និងអភិវឌ្ឍន៍របស់ចក្រភពអង់គ្លេស បានឲ្យដឹងនៅក្នុងសេចក្តីថ្លែងការណ៍មួយថា កិច្ចពិភាក្សានឹងសម្របសម្រួលកិច្ចសហប្រតិបត្តិការ ស្ដីពីបញ្ហាអ៊ុយក្រែន និងពិភាក្សាអំពីកិច្ចប្រឹងប្រែង ដើម្បីបង្កើនសម្ពាធផ្នែកសេដ្ឋកិច្ចលើរុស្ស៊ី។

ជាមួយគ្នានេះ សេចក្តីថ្លែងការណ៍នោះ បានបន្ថែមថា ការពិភាក្សានេះ ក៏នឹងរួមបញ្ចូលផងដែរនូវការបង្កើនសកម្មភាពប្រឆាំងនឹងការគំរាមកំហែងចម្រុះ ដូចជាការវាយប្រហារតាមប្រព័ន្ធអ៊ីនធឺណិត ការជ្រៀតជ្រែកក្នុងការបោះឆ្នោត និងការផ្សព្វផ្សាយព័ត៌មានមិនពិតរបស់រុស្ស៊ី។

ហើយលើសពីនោះទៀត លោកស្រី Kallas និងលោក Lammy ក៏នឹងពិនិត្យឡើងវិញនូវកិច្ចប្រឹងប្រែង ដើម្បីជំរុញដល់ការចំណាយ ក្នុងវិស័យការពារជាតិរបស់អឺរ៉ុប តាមរយៈ «គំនិតផ្តួចផ្តើមកម្រិតខ្ពស់» និងការត្រៀមខ្លួនផ្នែកយោធា ដើម្បីគាំទ្រដល់អង្គការសន្ធិសញ្ញាអាត្លង់ទិកខាងជើង ឬណាតូ (NATO)។

លោក Lammy បាននិយាយអំពីសង្គ្រាមនៅអ៊ុយក្រែនថា៖ «វាមានសារៈសំខាន់ណាស់ដែលយើងត្រូវធ្វើឲ្យប្រសើរឡើងនូវភាពជាដៃគូរបស់យើងជាមួយសហភាពអឺរ៉ុប ហើយធ្វើការរួមគ្នា ដើម្បីបញ្ចប់សង្រ្គាមនេះ និងផ្តល់សុវត្ថិភាពដល់ពលរដ្ឋរបស់យើងគ្រប់រូប»។ ចំណែកលោកស្រី Kallas បានប្រាប់អ្នកសារព័ត៌មាននៅទីក្រុងប្រ៊ុចសែល កាលពីថ្ងៃចន្ទថា លក្ខខណ្ឌដែលទាមទារដោយរុស្ស៊ីឲ្យយល់ព្រមលើបទឈប់បាញ់បង្ហាញថា ទីក្រុងមូស្គូពិតជាមិនចង់បានសន្តិភាពនោះឡើយ៕