មន្ត្រីជាន់ខ្ពស់ និងអ្នកការទូតរុស្ស៊ី បានប្រាប់សារព័ត៌មាន The Moscow Times ថា ទីក្រុងមូស្គូ មានក្ដីរីករាយត្រេកអរ ចំពោះចំណាត់ការរបស់ប្រធានាធិបតីអាមេរិក លោក Donald Trump ក្នុងការសម្រេចបិទប្រព័ន្ធផ្សព្វផ្សាយដែលផ្តល់មូលនិធិដោយសហរដ្ឋអាមេរិក គឺវិទ្យុអឺរ៉ុបសេរី/វិទ្យុសេរីភាព និងវិទ្យុសំឡេងសហរដ្ឋអាមេរិក។ ប្រភពទាំងអស់របស់សារព័ត៌មាន The Moscow Times បាននិយាយក្នុងលក្ខខណ្ឌមិនបញ្ចេញឈ្មោះ។

ដោយត្រូវបានបង្កើតឡើងដោយសហរដ្ឋអាមេរិក ក្នុងកំឡុងសម័យសង្គ្រាមត្រជាក់ ដើម្បីប្រឆាំងនឹងការឃោសនារបស់សូវៀត វិទ្យុអឺរ៉ុបសេរី/វិទ្យុសេរីភាព ត្រូវបានហាមឃាត់ នៅទូទាំងប្លុកកុម្មុយនីស្ត ដែលរបបទាំងនោះ តែងតែរារាំងរលកសញ្ញារបស់វិទ្យុនេះ។ ខណៈសេរីភាពសារព័ត៌មាន នៅរុស្ស៊ីសម័យទំនើបបានរីកចម្រើនកាន់តែខ្លាំងឡើង ក្រោមការរារាំងរបស់ប្រធានាធិបតី លោក Vladimir Putin វិទ្យុអឺរ៉ុបសេរី/វិទ្យុសេរីភាព និងវិទ្យុសំឡេងសហរដ្ឋអាមេរិក ត្រូវបានចាត់ទុកជា «សំឡេងរបស់គូអរិ» ជាថ្មីម្តងទៀត។

វិមានក្រឹមឡាំងមានការខឹងសម្បាជាពិសេស ដោយសារសាខាក្នុងតំបន់របស់វិទ្យុអឺរ៉ុបសេរី/វិទ្យុសេរីភាពចាក់ផ្សាយជាភាសាក្នុងស្រុក និងជនជាតិដើមភាគតិច នៅទូទាំងប្រទេសរុស្ស៊ី និងបណ្តាអតីតប្រទេសសហភាពសូវៀត ខណៈដែលពួកគេបានធ្វើឲ្យខូចដល់ការត្រួតពិនិត្យ ក្នុងសម័យសង្គ្រាម ដែលទីក្រុងមូស្គូបានដាក់ចេញ បន្ទាប់ពីមានការលុកលុយពេញបន្ទុកលើប្រទេសអ៊ុយក្រែន។ 

មន្ត្រីរុស្ស៊ីទាំងបច្ចុប្បន្ន និងអតីតចំនួន ២រូប បានប្រាប់សារព័ត៌មាន The Moscow Times ថា ការរាយការណ៍របស់ប្រព័ន្ធផ្សព្វផ្សាយទាំងនេះ បានបង្កើតបញ្ហាធ្ងន់ធ្ងរដល់ការឃោសនារបស់វិមានក្រឹមឡាំង ដែលបំផ្លាញឥទ្ធិពលរបស់ទីក្រុងមូស្គូ នៅក្នុងតំបន់ ក្រោយសម័យសហភាពសូវៀត។ 

សូមបញ្ជាក់ថា រដ្ឋបាលរបស់លោក Trump កាលពីចុងសប្តាហ៍ បានចាប់ផ្តើមបញ្ឈប់បុគ្គលិកនៅវិទ្យុសំឡេងសហរដ្ឋអាមេរិក និងប្រព័ន្ធផ្សព្វផ្សាយផ្សេងទៀត រួមទាំងវិទ្យុអឺរ៉ុបសេរី/វិទ្យុសេរីភាពផងដែរ បន្ទាប់ពីបង្កកមូលនិធិរបស់ពួកគេ៕