ដោយសារតែភាពតានតឹងពាណិជ្ជកម្មជាមួយសហរដ្ឋអាមេរិក អភិបាលក្រុង លោកស្រី Olivia Chow បាននិយាយកាលពីថ្ងៃទី១៧ ខែមីនាថា ទីក្រុង Toronto លែងផ្តល់ការលើកទឹកចិត្តផ្នែកហិរញ្ញវត្ថុ សម្រាប់ការប្រើប្រាស់រថយន្ត Tesla ទៀតហើយ។

គួរបញ្ជាក់ថា ទីក្រុងនេះកំពុងលើកកម្ពស់ការទទួលយកយានយន្តអគ្គិសនី (EV) ដែលត្រូវបានទិញប្រើប្រាស់ជាយានជំនិះ ឬសម្រាប់ជួល ដោយផ្តល់ឲ្យអ្នកបើកបរ និងម្ចាស់យានយន្តនូវការកាត់បន្ថយថ្លៃអាជ្ញាប័ណ្ណ និងថ្លៃបន្តឡើងវិញ រហូតដល់ចុងឆ្នាំ២០២៩ ដើម្បីជួយកាត់បន្ថយការបំភាយឧស្ម័ន។

ប៉ុន្តែលោកស្រី Chow បាននិយាយនៅក្នុងសន្និសីទសារព័ត៌មានមួយថា គិតត្រឹមថ្ងៃទី១ ខែមីនា រថយន្ត Tesla លែងមានសិទ្ធិទទួលបានការលើកទឹកចិត្តនេះទៀតហើយ ។

បន្ទាប់ពីសន្និសីទសារព័ត៌មាន លោកស្រី បានប្រាប់សារព័ត៌មាន Reuters ថា៖ «យានជំនិះ សម្រាប់ជួល ដូចជារថយន្តតាក់ស៊ី នឹងត្រូវស្វែងរករថយន្តប្រភេទផ្សេង។ មានរថយន្តអគ្គិសនីផ្សេងទៀតដែលពួកគេអាចទិញបាន»។

លោកស្រីបានបញ្ជាក់បន្ថែមថា ការដកចេញនេះ នឹងបន្តរហូតដល់បញ្ហាពាណិជ្ជកម្ម ជាមួយសហរដ្ឋអាមេរិក ត្រូវបានដោះស្រាយរួចរាល់។ ក្រុមហ៊ុន Tesla មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ ពាក់ព័ន្ធនឹងករណីនេះ៕