មេដឹកនាំក្រុមឧទ្ទាមហ៊ូទីយេម៉ែនលោក Abdul-Malik al-Houthi បានធ្វើការព្រមានកាលពីថ្ងៃចន្ទថា ក្រុមរបស់លោកនឹងប្រឈមមុខជាមួយទង្វើឈ្លានពានរបស់សហរដ្ឋអាមេរិក ដោយមានគោលដៅលើនាវាដឹកយន្តហោះ ជាការឆ្លើយតបនឹងអ្វីដែលលោកចាត់ទុកថាជាការឈ្លានពាន និងការគំាទ្ររបស់អាមេរិកដល់អ៊ីស្រាអែល ។

គួរឲ្យដឹងថា ការវាយប្រហារលើកដំបូងរបស់សហរដ្ឋអាមេរិក ទៅលើទឹកដីយេម៉ែន នៅក្រោមការដឹកនាំរបស់លោកប្រធានាធិបតី Donald Trump ក្នុងគោលបំណងបញ្ចប់យុទ្ធនាការបៀតបៀន និងរំខានផ្លូវទឹកនៅសមុទ្រក្រហមរបស់ក្រុមហ៊ូទីនោះ បានសម្លាប់មនុស្សជាង ៥០នាក់ និងបង្ករបួសជាច្រើន ។

ទីក្រុងវ៉ាស៊ីនតោន បានប្តេជ្ញាបន្តវាយលុកលើប្រទេសយេម៉ែន រហូតទាល់តែពួកឧទ្ទាមហ៊ូទី ឈប់វាយប្រហារលើការដឹកជញ្ជូននៅសមុទ្រក្រហម ដោយលោក Trump បានព្រមានថា លោកនឹងប្រើប្រាស់កម្លាំងដ៏ច្រើនលើសលប់ ដើម្បីកម្ទេចក្រុមសកម្មប្រយុទ្ធមួយនេះ ។

បង្ហាញខ្លួនតាមរយៈសុន្ទរកថាលើកញ្ចក់ទូរទស្សន៍ លោក al-Houthi និយាយថា ក្រុមរបស់លោកបានត្រៀមខ្លួនរួចរាល់ក្នុងការចាត់វិធានការកាន់តែរំខាន និងឈឺចាប់ជាងមុន បើសិនជាប្រតិបត្តិការក្នុងតំបន់របស់សហរដ្ឋអាមេរិក នៅតែបន្ត ។

ក្រុមឧទ្ទាមហ៊ូទី ដែលជាចលនាប្រដាប់អាវុធបានគ្រប់គ្រងតំបន់មានពលរដ្ឋរស់នៅច្រើនបំផុតរបស់យេម៉ែន បើទោះបីជាមានការទម្លាក់គ្រាប់បែកដឹកនាំដោយអារ៉ាប៊ីសាអ៊ូឌីតអស់រយៈពេលជិត ១ទសវត្សរ៍យ៉ាងណាក្តី បានបើកការវាយប្រហារលើនាវានៅជិតតំបន់ឆ្នេរ ចាប់តាំងពីខែវិច្ឆិកា ឆ្នាំ ២០២៣រហូតមក ធ្វើឲ្យអាក់ខានដល់ពាណិជ្ជកម្មសកលលោក ។

ការអះអាងការវាយប្រហាររបស់ក្រុមឧទ្ទាមហ៊ូទី ដែលបង្ខំឲ្យក្រុមហ៊ុនប្តូរផ្លូវធ្វើដំណើររបស់នាវា និងធ្វើឲ្យការចំណាយកាន់តែច្រើនជាងមុនជុំវិញតំបន់ភាគខាងត្បូងអាហ្វ្រិកនោះ គឺជាការបង្ហាញសាមគ្គីភាពជាមួយជនប៉ាឡេស្ទីន ខណៈការវាយប្រហាររបស់អ៊ីស្រាអែលនៅតំបន់ហ្កាហ្សាស្រ្ទីប ៕