​បេឡា​រុស៖ ទូរទស្សន៍​រដ្ឋ​ប្រទេស​បេឡា​រុស​បាន​បង្ហាញ​សកម្មភាព​របស់​លោក Alexander Lukashenko ជួប​ជាមួយ​ជនអន្តោប្រវេសន៍​នៅ​ទីក្រុង Bruzgi កាលពី​ថ្ងៃ​សុក្រ ជា​កន្លែង​ដែល​លោក​បាន​សន្យា​ថា​នឹង​ផ្តល់​ស្បៀងអាហារ និង​សម្លៀកបំពាក់​រដូវរងាដើម្បី​ស្នាក់​នៅ​តាម​ព្រំដែន​រវាង​ប្រទេស​អតីត​សហភាពសូវៀត និង​ប្រទេស​ប៉ូឡូញ​។

លោក Lukashenko បាន​សន្យា​បែបនេះ​ក្នុង​អំឡុង​ដំណើរ​ទស្សនកិច្ច​ទៅកាន់​កន្លែង​ស្នាក់​នៅ សម្រាប់​ជនអន្តោប្រវេសន៍​នៅ​ព្រំដែន​។ ដំណើរ​ទស្សនកិច្ច​រប​ស់​លោក Lukashenko ធ្វើឡើង​បន្ទាប់ពី​មាន​ភាព​តានតឹង​ជាច្រើន​សប្ដាហ៍​នៅ​ព្រំដែន ដែល​មនុស្ស​រាប់​រយ​នាក់នៅតែ​ជាប់​គាំង​។ ចាប់​តាំង​ពី​ថ្ងៃទី៨ ខែ​វិច្ឆិកា​មក មនុស្ស​មួយ​ក្រុម​ធំ​ដែល​ភាគច្រើន​មកពី​មជ្ឈិមបូព៌ាបាន​ជាប់​គាំង ​នៅ​ក្នុង​ប្រទេស​បេឡា​រុស​នៅ​ច្រក​ព្រំដែន​ជាមួយ​ប្រទេស​ប៉ូឡូញ​ ​ខណៈ​កងកម្លាំង​មកពី​ប្រទេស​ទាំង២ ប្រឈមមុខ​ដាក់គ្នា​ទៅវិញទៅមក​។ ជនអន្តោប្រវេសន៍​ភាគច្រើន​កំពុង​រត់គេច​ចេញពី​ជម្លោះ ឬ​គិត​ថា​អស់សង្ឃឹម​នៅ​ប្រទេស ហើយ​មានបំណង​ទៅកាន់​ប្រទេស​អាល្លឺម៉ង់ ឬ​ប្រទេស​អឺរ៉ុប​ខាង​លិច​ផ្សេងទៀត​។ លោក Lukashenko បាន​អំពាវ​នាវ​ជាថ្មី​ឱ្យ​ប្រទេស​អាល្លឺម៉ង់​ទទួលយក​ជនអន្តោប្រវេសន៍​។

អ្នកនាំពាក្យ​រដ្ឋាភិបាល​អាល្លឺម៉ង់​លោក Steffen Seibert កាលពី​ថ្ងៃ​សុក្រ​បាន​បដិសេធ​យ៉ាង​ដាច់អហង្ការ​ចំពោះ​ការ​អះ​អាង​របស់​លោក Lukashenko ដែល​ថា​ ប្រទេស​អាល្លឺម៉ង់​បាន​យល់ព្រម​ទទួលយក​ជនអន្តោប្រវេសន៍​ចំនួន ២ពាន់​នាក់​ដែល​បច្ចុប្បន្ន​នៅ​ក្នុង​ប្រទេស​បេឡា​រុស។ លោក Lukashenko បាន​និយាយ​ថា ក្រៅពី​ជនអន្តោប្រវេសន៍​ប្រមាណ ២ពាន់នាក់​នៅ​មូលដ្ឋាន​ព្រំដែន មាន​ជនអន្តោប្រវេសន៍​ពី ២​ពាន់​នាក់​ទៅ ៣ពាន់​នាក់​ទៀត​កំពុង​ស្ថិតនៅ​ក្នុង​ប្រទេស​បេឡា​រុស​។ លោក​បាន​សន្យា​ជាមួយ​ជនអន្តោប្រវេសន៍​ថា អាជ្ញាធរ​ប្រទេសបេឡា​រុស​នឹង​ជួយ​ពួកគេ​ឱ្យ​ត្រឡប់​ទៅ​ប្រទេស​កំណើត​វិញ ប្រសិនបើ​ពួកគេ​មានបំណង​ត្រឡប់​ទៅវិញ​៕

អត្ថបទ៖ ប៊ុន ថន