ទីភ្នាក់ងារសារព័ត៌មាន Yonhap បានរាយការណ៍ថា នគរបាលកូរ៉េខាងត្បូង នៅថ្ងៃអង្គារ (ទី១៨ ខែមីនា) បានចាប់ផ្តើមផ្តល់សន្តិសុខបន្ថែមទៀតដល់មេដឹកនាំគណបក្សប្រឆាំងដ៏ធំរបស់ប្រទេស គឺបក្សប្រជាធិបតេយ្យ បន្ទាប់ពីសមាជិកសភា បានបង្ហើបប្រាប់អំពីលទ្ធភាពនៃការមានផែនការធ្វើឃាត ដែលដាក់គោលដៅលើលោក Lee Jae-myung ។

ការលើកឡើងនេះកើតមាន បន្ទាប់ពីគណបក្សនេះ កាលពីសប្តាហ៍មុន បានជំរុញឲ្យនគរបាលបង្កើនសន្តិសុខ សម្រាប់លោក Lee បន្ទាប់ពីសមាជិកសភាមួយចំនួន បាននិយាយថា ពួកគេត្រូវបានប្រាប់អំពីផែនការធ្វើឃាតលើរូបលោក។ ពាក់ព័ន្ធនឹងសេចក្ដីរាយការណ៍នេះ នគរបាលមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។

គួររំលឹកថា កាលពីខែមករាឆ្នាំមុន លោក Lee ត្រូវបានបុរសម្នាក់ចាក់ចំកញ្ចឹងកដោយកាំបិត បន្ទាប់ពីបានចូលទៅសុំហត្ថលេខារបស់លោក។ ហើយបើយោងតាមរបាយការណ៍របស់ប្រព័ន្ធផ្សព្វផ្សាយ បានឲ្យដឹងថា ជនល្មើសត្រូវបានកាត់ទោសឲ្យជាប់ពន្ធនាគារ ១៥ឆ្នាំ។

នៅកូរ៉េខាងត្បូង ភាពតានតឹងបានកើនឡើងកាន់តែខ្ពស់ ចាប់តាំងពីប្រធានាធិបតី លោក Yoon Suk Yeol បានដាក់ចេញច្បាប់អាជ្ញាសឹករយៈពេលខ្លី កាលពីខែធ្នូឆ្នាំមុន ដែលការសម្រេចធ្វើបែបនោះបានបង្កឲ្យមានវិបត្តិនយោបាយដ៏អាក្រក់បំផុតមិនធ្លាប់មាន នៅក្នុងប្រទេសនេះ អស់រយៈពេលជាច្រើនទសវត្សរ៍មកនេះ៕