នគរបាលបារាំង នៅថ្ងៃអង្គារ (ទី១៨ ខែមីនា) នេះ បានបង្ខំឲ្យចាកចេញ សម្រាប់ជនអន្តោប្រវេសន៍ជាង ៤០០នាក់ដែលបាននាំគ្នារស់នៅដោយខុសច្បាប់ខាងក្នុងរោងមហោស្រព Gaite Lyrique នាកណ្តាលទីក្រុងប៉ារីស អស់រយៈពេលជាង ៣ខែមកហើយ។

ក្រុមមន្ត្រីបានចាប់ផ្តើមប្រតិបត្តិការរបស់ខ្លួន នៅមុនម៉ោង ៦ព្រឹក ម៉ោងក្នុងស្រុក (ត្រូវនឹងម៉ោង ៥ព្រឹក ម៉ោងសកល) នៅឯរោងមហោស្រពនោះ ជាកន្លែងដែលបាតុកររាប់រយនាក់ បានប្រមូលផ្តុំគ្នាតវ៉ាប្រឆាំងនឹងការបណ្តេញនេះ។

ចាប់តាំងពីថ្ងៃទី១០ ខែធ្នូឆ្នាំមុន ជនអន្តោប្រវេសន៍ ក្នុងនោះរួមទាំងអនីតិជនមិនមានអាណាព្យាបាលជាច្រើននាក់ផងដែរ បាននាំគ្នាកាន់កាប់កន្លែងប្រគុំតន្ត្រី និងសិល្បៈនេះ ជាផ្នែកនៃការទាមទារទីជម្រករបស់ពួកគេ ដែលនាំឲ្យអ្នកគ្រប់គ្រងរោងមហោស្រព Gaite Lyrique ផ្អាកប្រតិបត្តិការ កាលពីថ្ងៃទី១៧ ខែធ្នូ។

បដាដ៏ធំមួយព្យួរនៅរោងមហោស្រព Gaite Lyrique នេះ សរសេរថា «ជីវិតមនុស្ស ៤០០នាក់ កំពុងប្រឈមនឹងហានិភ័យ បុគ្គលិកការងារ ៨០នាក់ ស្ថិតក្រោមការគំរាមកំហែង»។ បាតុករបាននាំគ្នាស្រែកតវ៉ា នៅមុខរោងមហោស្រពនេះ ដើម្បីជាការបង្ហាញសាមគ្គីភាពជាមួយជនអន្តោប្រវេសន៍ ដោយជំរុញឲ្យអាជ្ញាធរមូលដ្ឋានផ្តល់លំនៅឋានស្ថិតស្ថេរដល់ពួកគេ ជាជាងបណ្ដេញពួកគេចេញ។ ក្រុមបាតុករ បាននាំគ្នាស្រែកថា «គួរឲ្យអាម៉ាស់ គួរឲ្យអាម៉ាស់ គួរឲ្យអាម៉ាស់ ដែលអាជ្ញាធរធ្វើសង្គ្រាមជាមួយអនីតិជនគ្មានទៅពឹង»។

នគរបាលបានប្រើប្រាស់ឧស្ម័នបង្ហូរទឹកភ្នែកមួយភ្លែត នៅពេលចាប់ផ្តើមប្រតិបត្តិការ ប៉ុន្តែជារួម ការជម្លៀសបានដំណើរការដោយគ្មានឧប្បត្តិហេតុ ឬការប៉ះទង្គិចណាមួយធំដុំឡើយ។ ហើយអភិបាលក្រុងប៉ារីស លោកស្រី Anne Hidalgo បានប្រាប់វិទ្យុ France Inter នៅថ្ងៃអង្គារនេះថា ការជម្លៀសត្រូវធ្វើឡើង ហើយផ្ទះសង្គ្រោះបន្ទាន់ត្រូវបានផ្តល់ជូនដល់ជនអន្តោប្រវេសន៍ទាំងនោះ៕