ពេលដែលបទឈប់បាញ់ហ្កាហ្សាដួលរលំ ក្រោយអ៊ីស្រាអែលបើកការវាយប្រហារជាថ្មីនៅព្រឹកថ្ងៃអង្គារនេះ ពលរដ្ឋអ៊ីស្រាអែលនៅទីក្រុងតែល អាវីវ បានបង្ហាញក្តីបារម្ភរបស់ពួកគេចំពោះចំណាប់ថ្នូរសេសសល់ ៥៩នាក់ ដែលត្រូវបានឃុំខ្លួនដោយក្រុមហាម៉ាស់ ។

នាយករដ្ឋមន្រ្តីអ៊ីស្រាអែលលោក Benjamin Netanyahu និយាយថា លោកបានណែនាំឲ្យយោធាចាត់វិធានការឲ្យបានខ្លាំងក្លាបំផុតលើក្រុមហាម៉ាស់ នៅតំបន់ហ្កាហ្សា ដើម្បីឆ្លើយតបចំពោះការបដិសេធន៍របស់ក្រុមមួយនេះ ពុំព្រមដោះលែងចំណាប់ថ្នូរ និងការច្រានចោលសំណើបទឈប់បាញ់ ។

នៅទីក្រុងតែល អាវីវ ជាទីដែលក្រុមអ្នកគាំទ្រចំណាប់ថ្នូរ និងគ្រួសាររបស់ពួកគេ បានបោះជំរំនៅជិតទីស្នាក់ការកណ្តាលសន្តិសុខអ៊ីស្រាអែលនោះ ពួកគេបានចំណាយពេលមួយយប់នៅទីនោះ ដោយនិយាយថា ព័ត៌មានពេលព្រឹកនេះ ធ្វើឲ្យមានក្តីបារម្ភជាខ្លាំងចំពោះជោគវាសនារបស់ចំណាប់ថ្នូរ ។ 

ពួកគេមួយចំនួននិយាយថា រដ្ឋាភិបាលអ៊ីស្រាអែល បានបោះបង់ចោលចំណាប់ថ្នូរ រួចចាប់ផ្តើមសង្រ្គាមឡើងវិញ ដើម្បីអភិរក្សក្រុមចម្រុះ និងបន្តកាន់អំណាច ។

ដោយឡែក នៅក្នុងទីក្រុងហ្សេរុយសាឡឹម អ្នកស្រុកមួយចំនួន និងភ្ញៀវនៅតាមតៀមការហ្វេដងផ្លូវ និយាយថា សកម្មភាពចរចារបស់ក្រុមហាម៉ាស់ នាំឲ្យកើតមានស្ថានភាពបែបនេះ ៕