អេហ្ស៊ីបដែលស្ថិតក្នុងចំណោមអ្នកសម្របសម្រួលនៅក្នុងកិច្ចព្រមព្រៀងបទឈប់បាញ់ឈានដល់កាលពីខែមករារវាងអ៊ីស្រាអែល និងក្រុមហាម៉ាស់ អំពាវនាវឲ្យមានភាពអត់ធ្មត់ និងជំរុញភាគីទាំងអស់ធ្វើការឆ្ពោះទៅរកកិច្ចព្រមព្រៀងជារៀងរហូត ក្រោយអ៊ីស្រាអែលបើកការវាយប្រហារថ្មីរបស់ខ្លួនលើតំបន់ហ្កាហ្សានាព្រឹកថ្ងៃអង្គារនេះ ។

ក្រុមអាជ្ញាធរប៉ាឡេស្ទីននិយាយនៅថ្ងៃអង្គារនេះថា ការវាយប្រហារតាមច្រកអាកាសរបស់អ៊ីស្រាអែល បានសម្លាប់មនុស្សជាង ៤០០នាក់ គំរាមកំហែងដល់ការដួលរលំទាំងស្រុងបទឈប់បាញ់រយៈពេល ២ខែ ពេលដែលអ៊ីស្រាអែលសច្ចាថា នឹងប្រើប្រាស់កម្លាំងខ្លាំងជាងនេះ ដើម្បីរំដោះចំណាប់ថ្នូរស្ថិតក្រោមការឃុំខ្លួនរបស់ក្រុមហាម៉ាស់ ។

ក្រុមជីវពលប៉ាឡេស្ទីនមួយនេះ ដែលនៅឃុំខ្លួនចំណាប់ថ្នូរ ៥៩នាក់ ក្នុងចំណោមចំណាប់ថ្នូរ ២៥០នាក់ បានចោទប្រកាន់អ៊ីស្រាអែលថាបានបំពានបទឈប់បាញ់ ធ្វើឲ្យគ្រោះថ្នាក់ដល់កិច្ចខិតខំរបស់ក្រុមអ្នកសម្របសម្រួលលើបទឈប់បាញ់អចិន្រ្តៃយ៍ ។

សូមបញ្ជាក់ថា នាយករដ្ឋមន្រ្តីអ៊ីស្រាអែលលោក Benjamin Netanyahu និយាយថា លោកបានណែនាំឲ្យយោធាចាត់វិធានការឲ្យបានខ្លាំងក្លាបំផុតលើក្រុមហាម៉ាស់ នៅតំបន់ហ្កាហ្សា ដើម្បីឆ្លើយតបចំពោះការបដិសេធន៍របស់ក្រុមមួយនេះ ពុំព្រមដោះលែងចំណាប់ថ្នូរ និងការច្រានចោលសំណើបទឈប់បាញ់ ៕