ប្រភពមួយពីរដ្ឋាភិបាលឥណ្ឌា នៅថ្ងៃអង្គារ (ទី១៨ ខែមីនា) នេះ បានប្រាប់ថា ប្រទេសឥណ្ឌាបានស្នើឲ្យសហរដ្ឋអាមេរិកចុះបញ្ជីក្រុមបំបែកខ្លួនសាសនា Sikh ជាអង្គការភេរវករ ដោយសំណើនេះកើតមានឡើងក្នុងរយៈពេលជាង ១ឆ្នាំ បន្ទាប់ពីទីក្រុងវ៉ាស៊ីនតោនបានឲ្យដឹងថា ខ្លួនបានបំផ្លាញផែនការភ្ជាប់ទំនាក់ទំនងជាមួយឥណ្ឌា ដែលចង់សម្លាប់មេដឹកនាំរបស់ក្រុមនេះ នៅក្នុងដែនដីរបស់សហរដ្ឋអាមេរិក។

គួររំលឹកថា ទីក្រុងវ៉ាស៊ីនតោនបានផ្សព្វផ្សាយជាសាធារណៈ អំពីផែនការនេះ កាលពីខែវិច្ឆិកា ឆ្នាំ២០២៣ ហើយក្រោយមកបានចោទប្រកាន់អតីតមន្ត្រីចារកម្មឥណ្ឌា ពីបទដឹកនាំគម្រោងដាក់គោលដៅលើលោក Gurpatwant Singh Pannun ដែលជាពលរដ្ឋមានសញ្ជាតិ២ អាមេរិក-កាណាដា និងជាទីប្រឹក្សាទូទៅនៃក្រុមសកម្មជនសាសនា Sikh ដើម្បីយុត្តិធម៌ (SFJ) ជាព្រឹត្តិការណ៍ដែលសាកល្បងការរីកចម្រើននៃទំនាក់ទំនងឥណ្ឌា-សហរដ្ឋអាមេរិក។

យ៉ាងណាក្ដី ប្រទេសឥណ្ឌា ដែលបានបដិសេធមិនមានជាប់ទាក់ទងជាផ្លូវការណាមួយនឹងផែនការនេះ បានបង្កើតក្រុមមួយ ដើម្បីស៊ើបអង្កេតការចោទប្រកាន់របស់ទីក្រុងវ៉ាស៊ីនតោន ហើយបានប្រាប់ឲ្យដឹងកាលពីខែមករាថា ក្រុមប្រឹក្សាបានផ្តល់អនុសាសន៍ឲ្យចាត់វិធានការផ្លូវច្បាប់លើបុគ្គលដែលមិនត្រូវបានបញ្ចេញឈ្មោះឲ្យដឹង។

ហើយប្រភពពីរដ្ឋាភិបាលឥណ្ឌាដែលបដិសេធមិនបង្ហាញអត្តសញ្ញាណ បានបង្ហើបប្រាប់ថា ការស្នើសុំរបស់ឥណ្ឌាទៅកាន់សហរដ្ឋអាមេរិក ដើម្បីឲ្យចុះបញ្ជីក្រុម SFJ ជាអង្គការភេរវករនេះ បានធ្វើឡើងក្នុងអំឡុងកិច្ចពិភាក្សា រវាងរដ្ឋមន្ត្រីការពារជាតិឥណ្ឌា លោក Rajnath Singh និងប្រមុខចារកម្មជាតិរបស់សហររដ្ឋអាមេរិក គឺលោកស្រី Tulsi Gabbard ដែលកំពុងធ្វើទស្សនកិច្ច នៅឥណ្ឌា។ ប្រព័ន្ធផ្សព្វផ្សាយឥណ្ឌា ក៏បានរាយការណ៍អំពីសំណើនេះផងដែរ។

គួរបញ្ជាក់ថា ដោយត្រូវបានបង្កើតឡើងក្នុងឆ្នាំ២០០៧ SFJ ធ្វើប្រជាមតិតស៊ូមតិ ដើម្បីឲ្យមានរដ្ឋដាច់ដោយឡែកមួយ សម្រាប់សាសនា Sikh ដែលហៅថា រដ្ឋ Khalistan នៅក្នុងប្រទេសឥណ្ឌាដែលភាគច្រើនកាន់សាសនាហិណ្ឌូ៕