ប្រធានាធិបតីអ៊ុយក្រែន លោក Volodymyr Zelenskiy បាននិយាយថា មេដឹកនាំរុស្ស៊ី លោក Vladimir Putin បានច្រានចោលសំណើរបស់សហរដ្ឋអាមេរិក សម្រាប់បទឈប់បាញ់ពេញលេញមួយកាលពីថ្ងៃអង្គារ (១៨ មីនា) បន្ទាប់ពីកិច្ចសន្ទនាតាមទូរសព្ទរវាងលោក Putin និងលោកប្រធានាធិបតីអាមេរិក Donald Trump ហើយបានជំរុញពិភពលោកឱ្យរារាំងការប៉ុនប៉ងណាមួយរបស់ទីក្រុងមូស្គូ ក្នុងការអូសបន្លាយសង្រ្គាមប្រឆាំងនឹងអ៊ុយក្រែន។

គួរឱ្យដឹងថា លោក Putin បានយល់ព្រមបញ្ឈប់ការវាយប្រហារជាបណ្ដោះអាសន្នលើរោងចក្រថាមពលអ៊ុយក្រែន ប៉ុន្តែបានបដិសេធមិនគាំទ្របទឈប់បាញ់រយៈពេល ៣០ថ្ងៃពេញនោះទេ ខណៈលោក Trump ស្វះស្វែងសម្រេចឱ្យបានជាជំហានដំបូងឆ្ពោះទៅរកកិច្ចព្រមព្រៀងសន្តិភាពអចិន្ត្រៃយ៍។

បន្ទាប់ពីកិច្ចពិភាក្សាតាមទូរសព្ទរវាងមេដឹកនាំរុស្ស៊ី-អាមេរិក លោក Zelenskiy ដែលបានយល់ព្រមលើបទឈប់បាញ់ ៣០ថ្ងៃជាយូរមកហើយនោះ បាននិយាយថា លោកនឹងគាំទ្រលើសំណើបទឈប់បាញ់មានកំណត់ណាមួយ ដែលដាក់ចេញដោយលោក Putin។ ប៉ុន្តែបន្ទាប់ពីទីក្រុងមូស្គូ បានបាញ់យានដ្រូនជាង ៤០គ្រឿងលើហេដ្ឋារចនាសម្ព័ន្ធស៊ីវិលអ៊ុយក្រែនប៉ុន្មានម៉ោងក្រោយមក លោក Zelenskiy ក៏បានអំពាវនាវឱ្យពិភពលោកបញ្ឈប់លោក Putin។

ពុំទាន់មានការអត្ថាធិប្បាយភ្លាមៗពីរុស្ស៊ី លើការវាយប្រហារប៉ុន្មានម៉ោងក្រោយកិច្ចសន្ទនារបស់លោក Putin និងលោក Trump នេះទេ។ ទាំងអ៊ុយក្រែន និងរុស្ស៊ីនិយាយថា ការវាយប្រហាររបស់ពួកគេមានគោលបំណងបំផ្លាញហេដ្ឋារចនាសម្ព័ន្ធសំខាន់ៗរបស់គ្នាទៅវិញទៅមកក្នុងកិច្ចប្រឹងប្រែងធ្វើសង្គ្រាម៕