ក្រុមឧទ្ទាម ហ៊ួទី ដែលគាំទ្រដោយអ៊ីរ៉ង់នៅក្នុងប្រទេសយេម៉ែន បាននិយាយនៅថ្ងៃពុធសប្ដាហ៍នេះថាពួកគេបានបើកការវាយប្រហារមួយទៀតប្រឆាំងនាវាចម្បាំងអាមេរិកក្នុងសមុទ្រក្រហមដែលជាការបាញ់ប្រហារលើកទីបួនរបស់ពួកគេទៅលើក្រុមនាវាផ្ទុកយន្តហោះក្នុងរយៈពេល៧២ ម៉ោង។  

អ្នកនាំពាក្យយោធារបស់ក្រុមឧទ្ទាមហ៊ួទី បាននិយាយថា ប្រតិបត្តិការនេះរួមមាន មីស៊ីលតម្រង់គោលដៅ និងយានដ្រូនជាច្រើនគ្រឿង សំដៅលើនាវាផ្ទុកយន្តហោះ USS Harry Truman” និងនាវាចម្បាំងសត្រូវមួយចំនួន” ដោយបន្ថែមថា ការវាយប្រហារនេះគឺជា “លើកទីបួនក្នុងរយៈពេល ៧២ ម៉ោង”។

អ្នកនាំពាក្យយោធារបស់ក្រុមនេះ លោក Yahya Sarea បាននិយាយដោយគ្មានភស្តុតាងក្នុងសេចក្តីថ្លែងការណ៍មួយតាមទូរទស្សន៍ កាលពីថ្ងៃអង្គារ ១៨ មីនា ថាក្រុមនេះបានបើកការវាយប្រហារលើកទី ៣ ប្រឆាំងនឹងនាវាផ្ទុកយន្តហោះអាមេរិក USS Harry S. Truman នៅសមុទ្រក្រហម។  

លោក Sarea បានបន្ថែមថា នាវាពិឃាតរបស់អាមេរិកក៏ត្រូវបានកំណត់គោលដៅផងដែរ ហើយក្រុម ហ៊ួទី នឹងបន្តវាយប្រហារលើ “គោលដៅអរិភាពទាំងអស់នៅក្នុងសមុទ្រក្រហម និងសមុទ្រអារ៉ាប់ រហូតដល់ការឈ្លានពានប្រឆាំងនឹងប្រទេសរបស់យើងបញ្ឈប់”។ 

ក្រុមហ៊ួទី បានប្រើយានដ្រូន និងបាញ់មីស៊ីលម្តងហើយម្តងទៀត ឆ្ពោះទៅកាន់ប្រទេសអ៊ីស្រាអែល ហើយបានបើកការវាយប្រហារលើការដឹកជញ្ជូនអន្តរជាតិនៅក្នុងដែនទឹកក្បែរប្រទេសយេម៉ែន ចាប់តាំងពីខែវិច្ឆិកា ឆ្នាំ២០២៣ មក ដើម្បីគាំទ្រដល់ប៉ាឡេស្ទីនជុំវិញសង្រ្គាមរបស់អ៊ីស្រាអែលជាមួយក្រុមហាម៉ាស។សហរដ្ឋអាមេរិកបានឆ្លើយតបដោយការវាយប្រហារតាមអាកាស ព្រមជាមួយអង់គ្លេស និងអ៊ីស្រាអែលលើក្រុមនេះវិញ ។រាល់ការវាយប្រហារតែងបណ្ដាលឲ្យមានការបំផ្លិចបំផ្លាញនិងសម្លាប់មនុស្សជាច្រើន ជាក់ស្ដែងមនុស្សជាង៥០នាក់បានស្លាប់ក្នុងការវាយប្រហាររបស់អាមេរិកថ្មីៗនេះ ៕