សមាជិកក្រុមប្រឹក្សាសន្តិសុខអង្គការសហប្រជាជាតិ បានពិភាក្សាអំពីការវាយប្រហារតាមអាកាសដែលអ៊ីស្រាអែល បានអនុវត្តនៅតំបន់ហ្កាហ្សាកាលពីថ្ងៃអង្គារ។ សមាជិកជាច្រើនបានអំពាវនាវឱ្យបទឈប់បាញ់ត្រូវបានបង្កើតឡើងវិញ។ ទោះជាយ៉ាងណា សហរដ្ឋអាមេរិកបានរុញច្រានគំនិតនេះ។

អាជ្ញាធរសុខាភិបាលតំបន់ហ្កាហ្សានិយាយថា ការវាយប្រហារបានសម្លាប់មនុស្សជាង៤០០នាក់។ អ្នកសង្កេតការណ៍អចិន្ត្រៃយ៍របស់ប៉ាឡេស្ទីនប្រចាំអង្គការសហប្រជាជាតិ លោក Riyad Mansour បាននិយាយថា ប្រជាជនប៉ាឡេស្ទីន កំពុងត្រូវបានសម្លាប់ដោយមិនរើសមុខ កំពុងត្រូវបានគេបដិសេធជំនួយមនុស្សធម៌ដោយមិនរើសអើង ត្រូវបានគេធ្វើបាប និងឃុំខ្លួន។

បេសកជនមកពីចក្រភពអង់គ្លេស បារាំង និងរុស្ស៊ី បានចូលរួមជាមួយ លោក Mansour ក្នុងការជំរុញឱ្យបញ្ចប់ការប្រយុទ្ធគ្នាភ្លាមៗ។ ប៉ុន្តែឯកអគ្គរដ្ឋទូតស្តីទីសហរដ្ឋអាមេរិក ប្រចាំអង្គការសហប្រជាជាតិ លោក ស្រី Dorothy Shea បានស្តីបន្ទោសការវាយប្រហារនេះទៅលើក្រុមហាម៉ាស។ លោកស្រី និយាយថា «វាត្រូវបានគេដឹងយ៉ាងច្បាស់ថា ក្រុមហាម៉ាស នៅតែបន្តប្រើប្រាស់ហេដ្ឋារចនាសម្ព័ន្ធស៊ីវិលជាឧបករណ៍ ហើយសហរដ្ឋអាមេរិកថ្កោលទោសការអនុវត្តនេះ។

បេសកជនរបស់អ៊ីស្រាអែល បាននិយាយថា ការវាយប្រហារនេះគឺចាំបាច់ ដោយសារតែក្រុមសកម្មប្រយុទ្ធ បានបដិសេធមិនដោះលែងចំណាប់ថ្នូរអ៊ីស្រាអែល។ លោក Basem Naim សមាជិកនៃការិយាល័យនយោបាយរបស់ហាម៉ាស និយាយថា ក្រុមរបស់លោកនឹងមិនចុះចាញ់ឡើយ។ «ប្រសិនបើអ៊ីស្រាអែល និងសហរដ្ឋអាមេរិក ជឿថាការដាក់សម្ពាធលើក្រុមហាម៉ាសនឹងនាំទៅរកការដោះលែងចំណាប់ថ្នូរ នោះគឺជាការយល់ខុស យើងមិនចង់ប្រយុទ្ធទេ ប៉ុន្តែប្រសិនបើវាចាំបាច់ យើងនឹងការពារខ្លួនយើងតាមគ្រប់មធ្យោបាយ។