លោកស្រី Ursula von der Leyen ប្រធានគណៈកម្មាធិការអឺរ៉ុប បាននិយាយកាលពីថ្ងៃអង្គារ ទី១៨ ខែមីនា ថា អឺរ៉ុបត្រូវតែបំពាក់អាវុធឡើងវិញនៅត្រឹមឆ្នាំ២០៣០។ នៅឆ្នាំ២០៣០ អឺរ៉ុបត្រូវតែមានជំហរការពាររឹងមាំ។

លោកស្រី បាននិយាយដូច្នេះ នៅក្នុងសុន្ទរកថា នៅសាលាបណ្ឌិត្យសភាយោធា ប្រទេសដាណឺម៉ាក នៅទីក្រុង Copenhagen ។

លោកស្រី von der Leyen បាននិយាយថា «ការត្រៀមខ្លួននៅឆ្នាំ២០៣០ មានន័យថា ត្រូវបំពាក់អាវុធឡើងវិញ និងអភិវឌ្ឍសមត្ថភាព ដើម្បីមានការទប់ស្កាត់ដែលអាចជឿទុកចិត្តបាន» ហើយការត្រៀមខ្លួននៅឆ្នាំ២០៣០ មានន័យថា មានមូលដ្ឋានឧស្សាហកម្មការពារជាតិ ដែលជាប្រយោជន៍នៃយុទ្ធសាស្ត្រ ប៉ុន្តែដើម្បីត្រៀមខ្លួនឲ្យបានរួចរាល់សម្រាប់ឆ្នាំ២០៣០ យើងត្រូវមានចំណាត់ការរពីឥឡូវនេះ។

លោកស្រី Von der Leyen ក៏បានប្រាប់ដែនដីកោះហ្គ្រីនឡែន និងប្រទេសដាណឺម៉ាក ថា សហភាពអឺរ៉ុបនឹងគាំទ្រជានិច្ចចំពោះដែនអធិបតេយ្យភាព និងបូរណភាពទឹកដី ដោយឆ្លើយតបទៅនឹងការរៀបចំរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ នៅលើកោះតំបន់អាកទិកនេះ។

លោក Trump បាននិយាយដដែលៗថា ទីក្រុងវ៉ាស៊ីនតោន មានផែនការកាន់កាប់ដែនដី Greenland ជាទឹកដីស្វយ័តរបស់ប្រទេសដាណឺម៉ាក។ អាជ្ញាធរទាំងនៅដែនដីហ្គ្រីនឡែន និងដាណឺម៉ាក បាននិយាយម្តងហើយម្តងទៀតថា ដែនដីនេះមិនមែនសម្រាប់លក់ទេ។