នាយករដ្ឋមន្ត្រីប្រទេសនូវែលហ្សេឡង់ លោក Christopher Luxon បាននិយាយកាលពីថ្ងៃអង្គារ ថា ប្រទេសឥណ្ឌា និងនូវែលហ្សេឡង់ មានបំណងចុះហត្ថលេខាលើកិច្ចព្រមព្រៀងពាណិជ្ជកម្មសេរី ក្នុងរយៈពេលពីរខែខាងមុខ ជាចំណាត់ការមួយដែលអាចពង្រីកពាណិជ្ជកម្មទ្វេភាគី ក្នុងវិស័យកសិកម្ម អវកាស និងថាមពលកកើតឡើងវិញ។

ប្រទេសឥណ្ឌា និងនូវែលហ្សេឡង់ បានចាប់ផ្ដើមឡើងវិញការចរចារសម្រាប់កតិកាសញ្ញាពាណិជ្ជកម្មក្រោយការផ្អាករយៈពេលមួយទសវត្សរ៍ និងបន្ទាប់ពីមានជំនួបរវាងនាយករដ្ឋមន្ត្រីឥណ្ឌា លោក Narendra Modi និងលោក Luxon ដែលកំពុងធ្វើទស្សនកិច្ចនៅក្នុងប្រទេសឥណ្ឌា។

លោក Luxon បាននិយាយទៅកាន់ក្រុមអ្នកធុរកិច្ចដែលបានមកជួបជុំគ្នាថា «សូមជំរុញទំនាក់ទំនងនេះឆ្ពោះទៅមុខ ហើយខ្ញុំទន្ទឹងរង់ចាំការចុះហត្ថលេខាលើកិច្ចព្រមព្រៀងនោះ ជាមួយនាយករដ្ឋមន្រ្តី លោក Modi ក្នុងរយៈពេល៦០ ថ្ងៃខាងមុខ» ។

កិច្ចពិភាក្សា កំពុងធ្វើឡើងប្រឆាំងនឹងទិដ្ឋភាពនៃភាពតានតឹងពាណិជ្ជកម្មសកលដែលកំពុងកើនឡើង បន្ទាប់ពីការសម្រេចចិត្តរបស់ប្រធានាធិបតីសហរដ្ឋអាមេរិក លោក Donald Trump ក្នុងការដំឡើងពន្ធបដិការលើទំនិញនាំចូលពីប្រទេសជាច្រើន រួមទាំងប្រទេសឥណ្ឌា។

ដោយសម្លឹងទៅរកការទប់ស្កាត់ផលប៉ះពាល់ពីគោលនយោបាយរបស់សហរដ្ឋអាមេរិក ប្រទេសឥណ្ឌា កំពុងពន្លឿនកិច្ចខិតខំប្រឹងប្រែងដើម្បីទទួលបានកិច្ចព្រមព្រៀងពាណិជ្ជកម្ម ជាមួយសហភាពអឺរ៉ុប និងចក្រភពអង់គ្លេស។