ជម្លោះដែលកំពុងបន្តរវាងរុស្ស៊ី និងអ៊ុយក្រែន បានមើលឃើញការប៉ះទង្គិចគ្នាកាន់តែខ្លាំងក្លានៅក្នុងតំបន់ Kursk ភាគខាងលិចប្រទេសរុស្ស៊ី កាលពីថ្ងៃអង្គារ (១៨ មីនា) ខណៈភាគីរុស្ស៊ីបានអះអាងថា កងកម្លាំងរបស់ខ្លួនបានដណ្ដើមគ្រប់គ្រងទីតាំងទីលំនៅស្ទើរតែទាំងអស់មកវិញនៅក្នុងតំបន់ព្រំដែននេះ។

យោងតាមរបាយការណ៍ពីទីភ្នាក់ងារសារព័ត៌មានរុស្ស៊ី TASS កាលពីថ្ងៃអង្គារ បានឱ្យដឹងថា អនុប្រធាននយោបាយ និងយោធាសំខាន់របស់កងកម្លាំងប្រដាប់អាវុធរុស្ស៊ី គឺលោក Apty Alaudinov បាននិយាយថា កងកម្លាំងទីក្រុងមូស្គូ បានដណ្តើមយកមកវិញនូវទីតាំងឈរជើងស្ទើរតែទាំងអស់នៅក្នុងតំបន់ Kursk ជាមួយនឹងវាយរុលផ្នែកយោធាដ៏សំខាន់។

នាថ្ងៃដដែលនោះ ភាគីអ៊ុយក្រែនបានបញ្ជាក់ថា កងកម្លាំងរបស់ខ្លួនបានវាយបកលើការវាយប្រហាររបស់រុស្ស៊ីចំនួន ១៨លើកនៅក្នុងតំបន់ Kursk ។

កាលពីចុងសប្ដាហ៍ ក្រុមមន្ត្រីរុស្ស៊ី បាននិយាយថា កងកម្លាំងទីក្រុងមូស្គូ បានបន្តប្រយុទ្ធយ៉ាងខ្លាំងក្លាដើម្បីវាយរុញទាហានអ៊ុយក្រែន ក្រុមចុងក្រោយ ចេញពីភាគខាងលិចរុស្ស៊ី បន្ទាប់ពីការវាយលុករយៈពេល ៧ខែរបស់អ៊ុយក្រែន ដែលមានគោលបំណងបង្វែរការផ្ដោតរបស់កងកម្លាំងទីក្រុងមូស្គូ ទទួលបានថ្នូរចរចា និងដាក់សម្ពាធលើលោកប្រធានាធិបតីរុស្ស៊ី Vladimir Putin៕