មន្រ្តីសេតវិមាន បានបញ្ជាក់ជាថ្មីនៅថ្ងៃអង្គារ (១៨ មីនា) ថា ប្រធានាធិបតីអាមេរិក លោក Donald Trump នៅតែមានបំណងបន្តដាក់ពន្ធបដិការថ្មី ឬហៅថាពន្ធតម្រូវឱ្យត្រូវគ្នាទៅមក ដែលនឹងចូលជាធរមាននៅថ្ងៃទី០២ មេសា ខាងមុខនេះ បើទោះបីជាមានការអត្ថាធិប្បាយពីមុនរបស់សំណាក់រដ្ឋមន្ត្រីរតនាគារ លោក Scott Bessent ដែលបង្ហាញពីលទ្ធភាពនៃការពន្យារពេលដំណើរការពន្ធនេះក៏ដោយ។

នៅពេលត្រូវសាកសួរដើម្បីបំភ្លឺការអត្ថាធិប្បាយរបស់លោក Bessent ដែលថាប្រទេសនានានឹងទទួលបានឱកាសដើម្បីបញ្ចៀសពន្ធខ្ពស់ដោយកាត់បន្ថយរបាំងពាណិជ្ជកម្មរបស់ពួកគេនោះ មន្ត្រីសេតវិមានបានឆ្លើយថា "គោលបំណងអនុវត្តពន្ធបដិការនៅថ្ងៃទី០២ ខែមេសា របស់លោកប្រធានាធីបតី Trump នៅតែមាន"។

គួរបញ្ជាក់ថា លោក Bessent បានប្រាប់កម្មវិធីទូរទស្សន៍ Fox Business Network ថា នៅថ្ងៃទី០២ ខែមេសា លោក Trump នឹងដាក់ពន្ធបដិការលើប្រទេសដៃគូពាណិជ្ជកម្ម ប៉ុន្តែអាចចរចាបានដើម្បីបញ្ចៀស "ជញ្ជាំងពន្ធ"។

នៅក្នុងជំនួបជាមួយប្រមុខអង្គការណាតូ កាលពីសប្ដាហ៍មុន លោក Trump បានបញ្ជាក់ច្បាស់ៗជាថ្មីម្ដងទៀតថា លោកនឹងមិនផ្លាស់ចិត្តលើការដាក់ពន្ធបដិការលើដៃគូពាណិជ្ជកម្មទាំងអស់ទូទាំងពិភពលោកនេះទេ ដោយលើកឡើងថា “បើគេគិតប្រាក់ពីអាមេរិក នោះអាមេរិកក៏នឹងគិតប្រាក់ពីគេវិញដូចគ្នាដែរ”៕