ទីភ្នាក់ងារសារព័ត៌មាន TASS បានរាយការណ៍នៅថ្ងៃពុធនេះថា សហភាពអឺរ៉ុប បានកត់ត្រាកម្រិតខ្ពស់បំផុតនៃការនាំចូលឧស្ម័នរបស់ខ្លួនពីប្រទេសរុស្ស៊ីនៅក្នុងខែមករា រយៈពេលពីរឆ្នាំមកនេះ ដោយបានទិញឧស្ម័នតតាមបំពង់បង្ហូរឧស្ម័ននិងឧស្ម័នធម្មជាតិរាវ (LNG) សរុបចំនួន១,៩ពាន់លានអឺរ៉ូ (ប្រហែល ២,០៨ពាន់លានដុល្លារអាមេរិក)។

យោងតាមទិន្នន័យរបស់ស្ថិតិអឺរ៉ុប និងការគណនារបស់សារព័ត៌មាន TASS បានឲ្យដឹងថា សហភាពអឺរ៉ុបបាននាំចូលឧស្ម័នធម្មជាតិរាវ(LNG) របស់រុស្ស៊ីតម្លៃ១,០៧ពាន់លានអឺរ៉ូ (១,១៧ ពាន់លានដុល្លារ) ជាការកើនឡើង១៧ភាគរយ ធៀបទៅនឹងខែធ្នូ ឆ្នាំ២០២៤ និងកើនឡើង៥៧ភាគរយធៀបនឹងខែមករា ឆ្នាំ ២០២៤។ នេះគឺជាការចំណាយខ្ពស់បំផុតលើឧស្ម័នធម្មជាតិរាវ(LNG) របស់រុស្ស៊ី ចាប់តាំងពីខែមករា ឆ្នាំ ២០២៣។

ប្រទេសបារាំង បាននាំមុខការនាំចូលដោយទិញឧស្ម័នធម្មជាតិរាវ(LNG) មានតម្លៃ៤៥៥ លានអឺរ៉ូ (៤៩៧ លានដុល្លារ) បន្ទាប់មកប្រទេសអេស្ប៉ាញ ២៦១,៥លានអឺរ៉ូ (២៨៥លានដុល្លារ) និងប្រទេសបែលហ្ស៊ិក ២៥៦,៧លានអឺរ៉ូ (២៨០លានដុល្លារ)។ ប្រទេសហូឡង់ ក៏បានបង្កើនការនាំចូលឧស្ម័នធម្មជាតិរាវ(LNG) របស់រុស្ស៊ីចំនួន១,៦ភាគរយចាប់ពីខែធ្នូ ឆ្នាំ២០២៤ ឡើងដល់ ១០០ លានអឺរ៉ូ (១០៩ លានដុល្លារ)។

នៅក្នុងខែមករា ការនាំចូលរបស់សហភាពអឺរ៉ុបនូវឧស្ម័នតាមបំពង់បង្ហូររបស់រុស្ស៊ី មានចំនួនសរុប៨៣៣ លានអឺរ៉ូ (៩១១លានដុល្លារ) ទោះបីជាមានការបញ្ឈប់ទាំងស្រុងនៃការបញ្ជូនឧស្ម័នឆ្លងកាត់ប្រទេសអ៊ុយក្រែនក៏ដោយ។