ទីភ្នាក់ងារសារព័ត៌មានយ៉ុនហាប់ បានរាយការណ៍នៅថ្ងៃពុធនេះថា នគរបាលររបស់ប្រទេសកូរ៉េខាងត្បូងមានផែនការដាក់ពង្រាយនគរបាលបង្ក្រាបកុបកម្មដែលអាចធ្វើទៅបាន នៅទូទាំងប្រទេស នៅថ្ងៃដែលតុលាការធម្មនុញ្ញ សម្រេចថាតើត្រូវដាក់ការចោទប្រកាន់ម្លាក់តំណែងលោកប្រធានាធិបតី Yoon Suk-yeol ជុំវិញការដាក់ច្បាប់អាជ្ញាសឹករបស់លោក ឬយ៉ាងណា។

នគរបាល នឹងចេញបទបញ្ជាកម្រិតខ្ពស់បំផុត ដើម្បីដាក់ពង្រាយនគរបាលបង្ក្រាបកុបកម្ម ប្រមាណ ២០.០០០នាក់ ក្នុងចំណោមអង្គភាព៣៣៨អង្គភាព នៅទូទាំងប្រទេសសម្រាប់ការតវ៉ាដែលត្រូវបានរំពឹងទុក និងការគ្រប់គ្រងហ្វូងមនុស្ស នៅពេលដែលតុលាការឈានដល់ការសន្និដ្ឋានលើការចោទប្រកាន់ទម្លាក់តំណែងរបស់លោក Yoon ។

ក្នុងចំណោមចំនួនសរុប នគរបាលបង្ក្រាបកុបកម្មប្រហែល ១៤.០០០ នាក់ នឹងត្រូវដាក់ពង្រាយនៅទីក្រុងសេអ៊ូល ជាកន្លែងដែលតុលាការធម្មនុញ្ញ ស្ថិតនៅទីនោះ។

ញត្តិចោទប្រកាន់លោក Yoon ត្រូវបានអនុម័តនៅក្នុងសភាជាតិនៅថ្ងៃទី១៤ ខែធ្នូ ហើយចាប់តាំងពីពេលនោះមក តុលាការធម្មនុញ្ញបានបើកសវនាការចំនួន១១លើក លើការចោទប្រកាន់លោក Yoon ដោយសាលក្រមចុងក្រោយ ត្រូវបានគេរំពឹងយ៉ាងទូលំទូលាយថា នឹងត្រូវបង្ហាញនៅក្នុងសប្តាហ៍នេះ។