ប្រទេសអេហ្ស៊ីប កូវ៉ែត និងបារ៉ែន បានព្រមានកាលពីថ្ងៃអង្គារថា ការវាយប្រហារជាថ្មីរបស់អ៊ីស្រាអែល ទៅលើតំបន់ហ្កាហ្សាស្ទ្រីប គំរាមកំហែងដល់សន្តិភាព និងស្ថិរភាពក្នុងតំបន់។

ការិយាល័យប្រធានាធិបតីអេហ្ស៊ីប បាននិយាយនៅក្នុងសេចក្តីថ្លែងការណ៍ពីរថា ការអត្ថាធិប្បាយនេះ ត្រូវបានធ្វើឡើងក្នុងអំឡុងពេលសន្ទនាតាមទូរស័ព្ទដាច់ដោយឡែករវាងប្រធានាធិបតីអេហ្ស៊ីបលោក អាប់ដែល ហ្វាតា អាល់ស៊ីស៊ី ( Abdel-Fattah al-Sisi) មេដឹកនាំនៃប្រទេសកូវ៉ែត លោក Sheikh Mishal Al-Ahmad Al-Jaber Al-Sabah និងព្រះមហាក្សត្រនៃប្រទេសបារ៉ែន Hamad bin Isa Al Khalifa។ 

ការិយាល័យនេះ បានបន្ថែមថា លោកស៊ីស៊ី និង លោក Al-Sabah បានថ្កោលទោសការបន្តអរិភាពរបស់អ៊ីស្រាអែល នៅតំបន់ហ្កាហ្សា ដែលរហូតមកដល់ពេលនេះ បានបណ្តាលឲ្យជនស៊ីវិលរាប់រយនាក់ បាត់បង់ជីវិត ក្នុងនោះមានកុមារ និងស្ត្រីផងដែរ។

មេដឹកនាំទាំងពីរ បានអះអាងថា ការវាយប្រហាររបស់អ៊ីស្រាអែល គឺជាការរំលោភច្បាប់អន្តរជាតិ និងកិច្ចព្រមព្រៀងឈប់បាញ់ ដែលសម្រេចបាន ដោយបញ្ជាក់ថា ការវាយប្រហារតាមអាកាសរបស់អ៊ីស្រាអែល ក៏ជាផ្នែកមួយនៃការប៉ុនប៉ងដោយចេតនា ដើម្បីធ្វើឲ្យតំបន់ហ្កាហ្សា មិនអាចរស់នៅបាន និងជំរុញឲ្យប្រជាជនប៉ាឡេស្ទីន រត់ទៅរស់នៅខាងក្រៅទឹកដីរបស់ខ្លួន។ 

លោកប្រធានាធិបតីអេហ្ស៊ីប និងមេដឹកនាំកូវ៉ែត បានសង្កត់ធ្ងន់លើតម្រូវការសម្រាប់សហគមន៍អន្តរជាតិក្នុងការទទួលបន្ទុករបស់ខ្លួន ដើម្បីជំរុញឲ្យមានបទឈប់បាញ់ជាបន្ទាន់ អនុវត្តដំណោះស្រាយរដ្ឋពីរ និងបង្កើតរដ្ឋប៉ាឡេស្ទីនតាមបណ្ដោយព្រំដែនឆ្នាំ ១៩៦៧ ដោយមានទីក្រុងហ្ស៊េរុយសាឡឹមខាងកើត ជារដ្ឋធានីរបស់ខ្លួន។