ទោចក្រយាន៖ វគ្គបណ្ដុះបណ្ដាលបច្ចេកទេសគ្រូបង្វឹកកីឡាទោចក្រយានអន្តរជាតិកម្រិត១ បានបញ្ចប់ដោយជោគជ័យ ក្រោយរៀបចំរយៈពេល ៥ថ្ងៃកាលពីចុងសប្ដាហ៍កន្លងទៅ នៅទីស្នាក់ការគណៈកម្មាធិការជាតិអូឡាំពិកកម្ពុជា ស្របពេលថ្នាក់ដឹកនាំសហព័ន្ធបានធ្វើការវាយតម្លៃខ្ពស់ចំពោះវគ្គនេះ ដែលជាឱកាសពង្រឹងសមត្ថភាពធនធានគ្រូបង្វឹក សម្រាប់ជំរុញការអភិវឌ្ឍវិស័យកីឡាទោចក្រយានកម្ពុជាឲ្យកាន់តែរីកចម្រើន។
ឯកឧត្តម កឹម សុខុន រដ្ឋលេខាធិការក្រសួងពាណិជ្ជកម្ម និងជាអនុប្រធានសហព័ន្ធខ្មែរកីឡាទោចក្រយាន បានបង្ហាញសុទិដ្ឋិនិយមចំពោះសិក្ខាកាមក្នុងវគ្គនេះដែលខិតខំសិក្សា និងក្រេបជញ្ជក់ចំណេះដឹងពីគ្រូឧទ្ទេសដើម្បីអភិវឌ្ឍន៍សមត្ថភាពខ្លួន សម្រាប់ពង្រឹងការបណ្ដុះបណ្ដាលកីឡាករ-កីឡាការិនីឲ្យកាន់តែមានសមត្ថភាព និងបច្ចេកទេសដើម្បីត្រៀមការប្រកួតនានា ពិសេសគោលដៅឆ្ពោះទៅស៊ីហ្គេមឆ្នាំ២០២៣ នៅកម្ពុជាតែម្ដង។ លោក នូ ចំរើន អគ្គលេខាធិការសហព័ន្ធបានបញ្ជាក់ថា វគ្គនេះមានសារៈសំខាន់ណាស់ដើម្បីលើកកម្ពស់គុណភាពចំណេះដឹងគ្រូបង្វឹកកម្ពុជា ជាមួយការសិក្សារបៀបរបបបច្ចេកទេសអន្តរជាតិ តាមនិយាមសហព័ន្ធកីឡាទោចក្រយានអន្តរជាតិ (UCI) ដោយផ្តោតមេរៀនគន្លឹះសំខាន់ៗជាច្រើន ស្របតាមផែនការកសាងធនធានមនុស្សឆ្ពោះទៅស៊ីហ្គេមឆ្នាំ២០២៣ របស់សហព័ន្ធ និងជាការណែនាំដ៏ខ្ពង់ខ្ពស់របស់ឯកឧត្តម ប៉ាន សូរស័ក្ដិ ដែលជាប្រធានសហព័ន្ធ។
លោកបន្ដថា ទោះបីមានរយៈពេលខ្លី តែសិក្ខាកាមបានយកចិត្តទុកដាក់ខ្ពស់ក្នុងការរៀនសូត្រ ដែលជាសញ្ញាណវិជ្ជមានមួយសម្រាប់អនាគតវិស័យកីឡាទោចក្រយានកម្ពុជា ដែលកំពុងសម្រួចទិសដៅឆ្ពោះទៅស៊ីហ្គេម និងព្រឹត្តិការណ៍អន្ដរជាតិផ្សេងៗ ជាក់ស្ដែងការត្រៀមធ្វើម្ចាស់ផ្ទះការប្រកួតកីឡាអូឡាំពិកយុវជនអាស៊ីលើកទី៥ ឆ្នាំ២០២៩ ដែលកម្ពុជាទើបចុះហត្ថលេខាទទួលសិទ្ធធ្វើម្ចាស់ផ្ទះនៅទីក្រុងឌូបៃ ប្រទេសអារ៉ាប់រួម កាលពីថ្មីៗផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
