នគរបាលទួរគីនៅថ្ងៃពុធនេះ បានចាប់ខ្លួនអភិបាលក្រុងអ៊ីស្តង់ប៊ុល ដែលជាគូប្រជែងដ៏សំខាន់របស់លោក ប្រធានាធិបតី រ៉េសិប តាយីប អឺដូហ្កាន់ (Recep Tayyip Erdogan) ដែលជាផ្នែកមួយនៃការស៊ើបអង្កេតលើការចោទប្រកាន់ពីបទពុករលួយ និងពាក់ព័ន្ធអំពើភេរវកម្ម។

ទីភ្នាក់ងារសារព័ត៌មាន Anadolu ដែលគ្រប់គ្រងដោយរដ្ឋ បានរាយការណ៍ថា រដ្ឋអាជ្ញាបានចេញដីកាចាប់ខ្លួនសម្រាប់មនុស្សប្រហែល ១០០នាក់ ផ្សេងទៀត។ អាជ្ញាធរបានបិទផ្លូវជាច្រើនជុំវិញទីក្រុងអ៊ីស្តង់ប៊ុល និងបានហាមឃាត់ការធ្វើបាតុកម្ម នៅក្នុងទីក្រុងនេះ រយៈពេល ៤ថ្ងៃ ក្នុងកិច្ចខិតខំប្រឹងប្រែងជាក់ស្តែងដើម្បទប់ស្កាត់ការតវ៉ា បន្ទាប់ពីការចាប់ខ្លួន។

ការចាប់ខ្លួននេះ បានធ្វើឡើង បន្ទាប់ពីការឆែកឆេរផ្ទះរបស់លោក Ekrem Imamoglu មួយថ្ងៃបន្ទាប់ពីសាកលវិទ្យាល័យមួយ បានធ្វើឲ្យសញ្ញាប័ត្ររបស់លោក អស់សុពលភាព ដោយបានដកសិទ្ធិយ៉ាងមានប្រសិទ្ធភាពចំពោះឥស្សរជនប្រឆាំងដ៏ពេញនិយម ពីការឈរឈ្មោះក្នុងប្រជែងតំណែងប្រធានាធិបតីបន្ទាប់។ ការមានសញ្ញាបត្រពីសាកលវិទ្យាល័យមួយ គឺជាតម្រូវការសម្រាប់ការឈរឈ្មោះក្នុងបោះឆ្នោត ក្រោមច្បាប់   ទួរគី។

គណបក្សរបស់អភិបាលក្រុងនេះ គឺគណបក្សប្រជាជនសាធារណៈរដ្ឋ ដែលជាគណបក្សប្រឆាំងដ៏ធំ នឹងរៀបចំការបោះឆ្នោតបឋម នៅថ្ងៃអាទិត្យ ដែលលោក Imamoglu ត្រូវបានគេរំពឹងថា នឹងត្រូវបានជ្រើសរើសសម្រាប់បេក្ខជនរបស់គណបក្សនេះ នៅក្នុងការបោះឆ្នោតប្រធានាធិបតី នាពេលអនាគត។ ការបោះឆ្នោតប្រធានាធិបតីបន្ទាប់របស់ប្រទេសទួរគី ត្រូវបានកំណត់ពេលសម្រាប់ឆ្នាំ ២០២៨ ប៉ុន្តែការបោះឆ្នោតមុនអាណត្តិ ក៏ទំនងជាអាចកើតឡើងដែរ។