នាយករដ្ឋមន្រ្តីអង់គ្លេស លោក Keir Starmer បានបញ្ជាក់ជាថ្មីពីការគាំទ្រឥតងាករេរបស់ប្រទេសនេះ សម្រាប់អ៊ុយក្រែន នៅក្នុងកិច្ចពិភាក្សាតាមទូរស័ព្ទ ជាមួយប្រធានាធិបតីអ៊ុយក្រែន លោក វ្ល៉ូឌីមី ហ្សេឡិនស្គី កាលពីល្ងាចថ្ងៃអង្គារ។ នេះបើយោងតាមសេចក្តីថ្លែងការណ៍របស់សភាអង់គ្លេស។

សេចក្តីថ្លែងការណ៍ បានឲ្យដឹងថា៖«លោកនាយករដ្ឋមន្ត្រី បាននិយាយជាមួយប្រធានាធិបតីលោក ហ្សេឡិនស្គី នាល្ងាចថ្ងៃអង្គារ។ ពួកគេបានពិភាក្សាអំពីវឌ្ឍនភាព ដែលប្រធានាធិបតីអាមេរិក លោក ដូណាល់ ត្រាំ បានធ្វើឡើង ឆ្ពោះទៅរកបទឈប់បាញ់ នៅក្នុងកិច្ចពិភាក្សា ជាមួយប្រទេសរុស្ស៊ី»។

សេចក្តីថ្លែងការណ៍ បានបន្ថែមថា៖«លោកប្រធានាធិបតី ហ្សេឡិនស្គី បានធ្វើបច្ចុប្បន្នភាពអំពីស្ថានភាពនៅជួរមុខ ហើយនាយករដ្ឋមន្ត្រីបានរំលឹកឡើងវិញនូវការគាំទ្រដែលមិនផ្លាស់ប្តូររបស់ចក្រភពអង់គ្លេស» ។

នៅព្រឹកថ្ងៃអង្គារនោះដែរ ប្រធានាធិបតីអាមេរិក លោក ដូណាល់ ត្រាំ និងសមភាគីរុស្ស៊ី លោក វ្ល៉ាឌីមៀ ពូ  ទីន បានព្រមព្រៀងគ្នាលើ «បទឈប់បាញ់ថាមពល និងហេដ្ឋារចនាសម្ព័ន្ធ» នៅអ៊ុយក្រែន ហើយនឹង ធ្វើការចរចាបច្ចេកទេស«ភ្លាមៗ»ស្តីពីការអនុវត្តបទឈប់បាញ់ដែនសមុទ្រ នៅសមុទ្រខ្មៅ បទឈប់បាញ់ពេញលេញ និងសន្តិភាពអចិន្ត្រៃយ៍។ នេះបើយោងតាមសេចក្តីថ្លែងការណ៍របស់សេតវិមាន។