ក្រុមសិទ្ធិមនុស្ស ក្នុងប្រទេសឥណ្ឌូនេស៊ី នៅថ្ងៃពុធ (ទី១៩ ខែមីនា) បានជំរុញឲ្យរដ្ឋសភាបដិសេធការកែប្រែច្បាប់យោធាដ៏ចម្រូងចម្រាស់ ដោយលើកឡើងថា កំណែទម្រង់នេះនឹងនាំឲ្យប្រទេសប្រជុំកោះនេះវិលទៅរកសម័យកាលនៃការត្រួតត្រាយោធា និងបង្កើតឲ្យមានភាពមិនច្បាស់លាស់ផ្នែកច្បាប់។

សភាឥណ្ឌូនេស៊ី ត្រូវបានរំពឹងថា នឹងអនុម័តច្បាប់នេះនៅថ្ងៃទី២០ ខែមីនា អំឡុងកិច្ចប្រជុំពេញអង្គ បន្ទាប់ពីគណៈកម្មាធិការសភាដែលទទួលខុសត្រូវត្រួតពិនិត្យយោធា បានយល់ព្រមទទួលយកការកែប្រែដែលនឹងអនុញ្ញាតឲ្យបុគ្គលិកកងកម្លាំងប្រដាប់អាវុធកាន់មុខតំណែងស៊ីវិលបន្ថែមទៀត។

ក្រុមសិទ្ធិមនុស្ស និងអង្គការនិស្សិត បានអំពាវនាវឲ្យធ្វើបាតុកម្ម នៅខាងក្រៅសភា នាថ្ងៃទី២០ ខែមីនានោះ។ វិទ្យាស្ថានជំនួយផ្នែកច្បាប់របស់ក្រុមសិទ្ធិមនុស្ស បានលើកឡើងថា ការកែប្រែនេះនឹងទាញប្រទេសឥណ្ឌូនេស៊ីឲ្យវិលទៅរករយៈពេល ៣០ឆ្នាំមុន ជាយុគសម័យមួយដែលបុរសខ្លាំង Suharto បានប្រើកម្លាំងយោធា ដើម្បីគ្រប់គ្រងកិច្ចការស៊ីវិល និងរារាំងអ្នកមានគំនិតផ្ទុយ ក្នុងប្រទេសដែលមានប្រជាជនកាន់សាសនាឥស្លាមភាគច្រើនបំផុត នៅលើពិភពលោក។

រដ្ឋាភិបាលការពារសេចក្តីស្នើច្បាប់នេះ ដោយលើកឡើងថា ខ្លួនបានដោះស្រាយក្ដីព្រួយបារម្ភទាំងនោះ ហើយបានទម្លាក់ចោលលក្ខន្តិកខ្លះ ដោយកំណត់ថា មន្ត្រីយោធាត្រូវតែលាលែងពីតំណែងជាមុនសិន មុននឹងត្រូវបានដាក់ឲ្យកាន់តួនាទីស៊ីវិលនានា៕