កងកម្លាំងជើងទឹកអ៊ីរ៉ាក់ បាននិយាយនៅក្នុងសេចក្តីថ្លែងការណ៍មួយថា កងទ័ពជើងទឹក បានរឹបអូសនាវា មិនស្គាល់អត្តសញ្ញាណមួយគ្រឿង នៅក្នុងដែនទឹកអ៊ីរ៉ាក់ ក្នុងឈូងសមុទ្រ ដែលគេសង្ស័យថា បានរត់ពន្ធប្រេងឥន្ធនៈ។

ការរត់ពន្ធប្រេងឥន្ធនៈ គឺជារឿងធម្មតា នៅក្នុងដែនទឹកឈូងសមុទ្រ ដែលប្រេងត្រូវបានឧបត្ថម្ភធនយ៉ាងច្រើន ពីប្រទេសមួយចំនួន ត្រូវបានលក់នៅលើទីផ្សារងងឹត ទៅឲ្យអ្នកទិញទូទាំងតំបន់ ទោះបីវាជារឿងកម្រណាស់សម្រាប់អាជ្ញាធរអ៊ីរ៉ាក់ ក្នុងការចាប់នាវារត់ពន្ធប្រេងក៏ដោយ។

នាវាល្បាតរបស់កងទ័ពជើងទឹក បានស្ទាក់ចាប់នាវានេះ កាលពីថ្ងៃអង្គារ បន្ទាប់ពីទទួលបានព័ត៌មានអំពីការសង្ស័យថា ជាសកម្មភាពខុសច្បាប់។ នេះបើយោងតាមសេចក្តីថ្លែងការណ៍របស់កងទ័ពជើងទឹក ដែលបានចេញផ្សាយ កាលពីល្ងាចថ្ងៃអង្គារ។

កងទ័ពជើងទឹក បាននិយាយថា កាពីទែនអ៊ីរ៉ង់ម្នាក់ ជនជាតិឥណ្ឌា ៨នាក់ និងសមាជិកនាវិកអ៊ីរ៉ាក់ ពីរនាក់ នៅលើនាវានោះ។

កងទ័ពជើងទឹក បានបញ្ចេញរូបភាពនៃនាវាដែលមិនមានឈ្មោះ ដោយមិនបានផ្តល់ព័ត៌មានលម្អិតបន្ថែមអំពីនាវាទេ។

កងទ័ពជើងទឹក បាននិយាយថា នាវានេះ ត្រូវបានអូសទៅកាន់មូលដ្ឋានទ័ពជើងទឹក Umm Qasr ដើម្បីការស៊ើបអង្កេតបន្ថែម ហើយនាវិកត្រូវបានប្រគល់ទៅឲ្យនគរបាលក្នុងតំបន់។