ទីភ្នាក់ងារសារព័ត៌មានដ៏ធំរបស់ប្រទេសអ៊ីតាលី គឺ ANSA និងប្រព័ន្ធផ្សព្វផ្សាយផ្សេងទៀត នៅថ្ងៃពុធ (ទី១៩ ខែមីនា) បានរាយការណ៍ថា ជនអន្តោប្រវេសន៍ចំនួន ៦នាក់ បានបាត់បង់ជីវិត ហើយ ៤០នាក់ទៀត កំពុងបាត់ខ្លួន បន្ទាប់ពីទូក ១គ្រឿង បានលិចនៅម្ដុំកោះ Lampedusa របស់ប្រទេសអ៊ីតាលី កាលពីល្ងាចថ្ងៃអង្គារ។

នៅព្រឹកថ្ងៃពុធនេះ សារព័ត៌មាន ANSA និងទីភ្នាក់ងារព័ត៌មានផ្សេងទៀត បានរាយការណ៍ថា រហូតមកដល់ពេលនេះ នាវាឆ្មាំល្បាតឆ្នេរអ៊ីតាលីបានជួយសង្គ្រោះមនុស្សចំនួន ១០នាក់ និងបន្តស្វែងរកអ្នកនៅមានជីវិតផ្សេងទៀត ។

យ៉ាងណាក្ដី ឆ្មាំល្បាតឆ្នេរអ៊ីតាលី មិនបានឆ្លើយតបភ្លាមៗនោះឡើយ ចំពោះសំណើរបស់ទីភ្នាក់ងារសារព័ត៌មាន Reuters ដើម្បីសុំការបញ្ជាក់ អំពីរបាយការណ៍នោះ។

តែទីភ្នាក់ងារសារព័ត៌មានទាំងនោះ បានរាយការណ៍ថា អ្នករួចជីវិត បានប្រាប់ក្រុមអ្នកជួយសង្គ្រោះថា មនុស្សជាច្រើន នៅក្នុងចំណោមក្រុមជនអន្តោប្រវេសន៍ចំនួន ៥៦នាក់ បានធ្លាក់ចូលទៅក្នុងទឹក ដោយសារតែអាកាសធាតុអាក្រក់ បន្ទាប់ពីបានចាកចេញពីប្រទេសទុយនីស៊ី តាមទូកពោង៕