ទីប្រឹក្សាសន្តិសុខជាតិអារ៉ាប់រួម លោក Sheikh Tahnoon bin Zayed Al-Nahyan បានជួបជាមួយប្រធានាធិបតីអាមេរិក លោក ដូណាល់ ត្រាំ ( Donald Trump) នៅសេតវិមាន នៅថ្ងៃពុធនេះ ដោយមានវត្តមានមន្ត្រីជាន់ខ្ពស់អាមេរិកជាច្រើនរូប។

ទីភ្នាក់ងារសារព័ត៌មាន WAM របស់រដ្ឋ បានរាយការណ៍ថា៖«លោក Sheikh Tahnoon bin Zayed និងលោកប្រធានាធិបតីសហរដ្ឋអាមេរិក បានពិភាក្សាអំពីឱកាស ដើម្បីពង្រឹងភាពជាដៃគូយុទ្ធសាស្ត្ររយៈពេលវែង រវាងអារ៉ាប់រួម និងទីក្រុងវ៉ាស៊ីនតោន ហើយបានស្វែងរកវិធី ដើម្បីបង្កើនភាពជាដៃគូនេះ ដើម្បីបម្រើផលប្រយោជន៍រួមរបស់ពួកគេ»។

លោក Sheikh Tahnoon កំពុងបំពេញទស្សនកិច្ចជាផ្លូវការ នៅសហរដ្ឋអាមេរិក ជាកន្លែងដែលលោកនឹងជួបជាមួយមន្ត្រីរដ្ឋបាលជាន់ខ្ពស់ និងមេដឹកនាំពាណិជ្ជកម្មរបស់សហរដ្ឋអាមេរិក។

ក្នុងអំឡុងពេលជំនួបជាមួយលោក ត្រាំ លោក Tahnoon បានអះអាងពីការប្តេជ្ញាចិត្តរបស់ប្រទេសអារ៉ាប់រួម ក្នុងការពង្រឹងទំនាក់ទំនងសេដ្ឋកិច្ច ជាមួយសហរដ្ឋអាមេរិក តាមរយៈការពង្រីកភាពជាដៃគូ។

លោក Sheikh Tahnoon ក៏បានជួបជាមួយទីប្រឹក្សាសន្តិសុខជាតិអាមេរិក លោក Michael Waltz និងបានពិភាក្សាអំពីវិធីជំរុញទំនាក់ទំនងទ្វេភាគី និងការវិវឌ្ឍចុងក្រោយបង្អស់ ជុំវិញបញ្ហាផលប្រយោជន៍ទៅវិញទៅមក។