ក្រសួងឧស្សាហកម្ម នៅថ្ងៃពុធ (ទី១៩ ខែមីនា) បានប្រាប់ឲ្យដឹងថា រដ្ឋមន្ត្រីឧស្សាហកម្មរបស់ប្រទេសកូរ៉េខាងត្បូង នឹងធ្វើទស្សនកិច្ចនៅទីក្រុងវ៉ាស៊ីនតោន ក្នុងសប្តាហ៍នេះ ដើម្បីពិភាក្សាជាមួយមន្ត្រីជាន់ខ្ពស់របស់សហរដ្ឋអាមេរិក អំពីការព្រួយបារម្ភរបស់ប្រទេសនេះ ពាក់ព័ន្ធនឹងការដាក់ចូល ក្នុងបញ្ជីតាមដានរបស់អាមេរិក និងដើម្បីជំរុញឲ្យមានប្រព្រឹត្តដោយស្មើភាព លើពន្ធគយ។

គួរបញ្ជាក់ថា ការដាក់ឈ្មោះរបស់ក្រសួងថាមពលសហរដ្ឋអាមេរិក ដែលថា កូរ៉េខាងត្បូងជា «ប្រទេសរសើប» បានបង្កឲ្យមានភាពចម្រូងចម្រាស នៅក្នុងទីក្រុងសេអ៊ូល ដោយសម្ព័ន្ធមិត្តរបស់សហរដ្ឋអាមេរិកមួយនេះ ត្រូវបានដាក់ក្នុងចំណាត់ថ្នាក់ទាបបំផុតនៃបញ្ជីតាមដានដែលរួមមានទាំងប្រទេសចិន អ៊ីរ៉ង់ និងកូរ៉េខាងជើង ក្នុងចំណោមប្រទេសដទៃទៀត។

ក្រសួងបានឲ្យដឹងនៅក្នុងសេចក្តីថ្លែងការណ៍មួយថា រដ្ឋមន្ត្រីឧស្សាហកម្ម លោក Ahn Duk-geun នឹង «ស្វែងរកវិធានការនានា ដើម្បីដោះស្រាយបញ្ហាកំណត់ជាប្រទេសរសើបនេះ» យ៉ាងឆាប់រហ័ស។

ដំណើរទស្សនកិច្ចរបស់លោក Ahn គឺជាឱកាសដ៏សំខាន់មួយ។ នេះជាការលើកឡើងរបស់រដ្ឋមន្ត្រីការបរទេស លោក Cho Ta-yul ដែលបានប្រាប់សមាជិកសភានៅថ្ងៃពុធនេះ នៅពេលត្រូវបានចោទសួរអំពីថា តើលោកគិតថា ទីក្រុងវ៉ាស៊ីនតោនអាចត្រូវបានបញ្ចុះបញ្ចូលឲ្យដកកូរ៉េខាងត្បូងចេញពីបញ្ជីតាមដានដែរ ឬទេ។

លោក Joseph Yun ឯកអគ្គរដ្ឋទូតស្តីទីរបស់សហរដ្ឋអាមេរិកប្រចាំទីក្រុងសេអ៊ូល បាននិយាយកាលពីថ្ងៃអង្គារថា ប្រទេសកូរ៉េខាងត្បូងត្រូវបានបញ្ចូលទៅក្នុងបញ្ជីនេះ ដោយសារតែអ្នកទៅមើលបន្ទប់ពិសោធន៍របស់ក្រសួងថាមពលបានដោះស្រាយព័ត៌មានរសើបមិនត្រឹមត្រូវ៕