ការមានទំនាក់ទំនងកាន់តែជិតស្និទ្ធឡើងៗ រវាងប្រទេសចិន និងរុស្ស៊ី បានធ្វើឲ្យប្រធានាធិបតីអាមេរិក លោក Donald Trump បង្ហាញនូវការប្រុងប្រយ័ត្ន ដោយលើកឡើងពីផែនការលើកកម្ពស់ទំនាក់ទំនងជាមួយប្រទេសទាំង២ ដែលបានរួមគ្នាតទល់ជាមួយសហរដ្ឋអាមេរិក នៅលើឆាកពិភពលោក។

អំឡុងការអត្ថាធិប្បាយដែលបានកើតឡើងភ្លាមៗ បន្ទាប់ពីរូបលោកបានបញ្ចប់កិច្ចពិភាក្សាជាមួយប្រធានាធិបតីរុស្ស៊ី លោក Vladimir Putin ដែលខកខានមិនបានធានាឲ្យមានបទឈប់បាញ់រយៈពេល ៣០ថ្ងៃ នៅអ៊ុយក្រែន មេដឹកនាំរបស់សហរដ្ឋអាមេរិករូបនេះ បានប្រាប់ប្រព័ន្ធផ្សព្វផ្សាយ Fox News ថា៖ «ក្នុងនាមជាអ្នករៀនសូត្រពីប្រវត្តិសាស្ត្រ ដែលខ្ញុំបានឃើញព្រឹត្តិការណ៍កើតឡើងទាំងអស់ រឿងដំបូងដែលអ្នកត្រូវដឹងនោះ គឺអ្នកមិនចង់រុស្ស៊ី និងចិនរួមគ្នាឡើយ»។

យ៉ាងណាក្ដី មេដឹកនាំទៅពីគណបក្សសាធារណរដ្ឋរូបនេះ បានបង្ហាញពីការសង្ស័យ ជុំវិញមូលដ្ឋានគ្រឹះនៃទំនាក់ទំនងទ្វេភាគីរបស់ក្រុងមូស្គូ និងក្រុងប៉េកាំង ដោយនិយាយថា វាគឺ «ខុសប្រក្រតី»។ ហើយលោកបានបន្ថែមថា៖ «ឥឡូវនេះ ពួកគេប្រហែលជាមានទំនាក់ទំនងជិតស្និទ្ធហើយ ប៉ុន្តែយើងនឹងធ្វើជាមិត្តជាមួយប្រទេសទាំង២»។

ការឱបក្រសោបប្រទេសរុស្ស៊ីរបស់លោក Trump ត្រូវបានអ្នកវិភាគមួយចំនួន មើលឃើញថា ជាការប៉ុនប៉ងបំបែកទីក្រុងមូស្គូពីទីក្រុងប៉េកាំង ជាអ្វីដែលគេហៅថា «បញ្ច្រាស Nixon» ដែលជាការសំដៅទៅលើកិច្ចប្រឹងប្រែងរបស់អាមេរិក ក្នុងសម័យសង្រ្គាមត្រជាក់ ដើម្បីបំបែកមហាអំណាចទាំង២៕