ប្រធានាធិបតីហុងគ្រី បានចុះហត្ថលេខាលើច្បាប់ស្នើឡើងដោយគណបក្សកាន់អំណាចរបស់លោកនាយករដ្ឋមន្ត្រី Viktor Orban ដែលនឹងហាមឃាត់សហគមន៍ LGBTQ+ (អ្នកស្រឡាញ់ភេទដូចគ្នា) មិនឲ្យដើរដង្ហែក្បួនប្រចាំឆ្នាំ Pride របស់ពួកគេ ដោយផ្គើននឹងការរិះគន់ពីអង្គការសិទ្ធិមនុស្ស ដែលថា ការសម្រេចនេះរឹតត្បិតសេរីភាពការជួបជុំគ្នា។

ក្រុមអ្នកតវ៉ា បាននាំគ្នាបិទស្ពានមួយ នៅកណ្តាលទីក្រុង Budapest កាលពីល្ងាចថ្ងៃអង្គារ (ទី១៨ ខែមីនា) បន្ទាប់ពីសភាបានអនុម័តវិធានការនេះ ដោយបានពន្លឿននូវច្បាប់ដែលត្រូវបានស្នើឡើងដោយគណបក្សស្តាំនិយមជ្រុលរបស់លោក Orban គឺបក្ស Fidesz កាលពីថ្ងៃចន្ទ។

លោកប្រធានាធិបតី Tamas Sulyok អតីតប្រធានតុលាការធម្មនុញ្ញដែលត្រូវបានជ្រើសរើសឲ្យកាន់តំណែងមិនសូវមានឥទ្ធិពល កាលពីឆ្នាំមុន ដោយសភាមានសំឡេងភាគច្រើនរបស់បក្ស Fidesz បានចុះហត្ថលេខាលើច្បាប់នេះ។ ការិយាល័យរបស់លោកមិនបានឆ្លើយតបនោះឡើយ ចំពោះសំណួររបស់សារព័ត៌មាន Reuters នៅថ្ងៃពុធនេះ។

ការចេញច្បាប់ហាមប្រាមការហែរក្បួន Pride នេះ ធ្វើឡើងដោយសារហេតុផលថា ការដើរដង្ហែនោះអាចត្រូវបានចាត់ទុកថា បង្កគ្រោះថ្នាក់ដល់កុមារ។ ច្បាប់នេះក៏កំណត់ផងដែរថា នគរបាលអាចប្រើប្រាស់កាមេរ៉ាសម្គាល់មុខ ដើម្បីកំណត់អត្តសញ្ញាណអ្នកដែលចូលរួមក្នុងព្រឹត្តិការណ៍នេះ និងដាក់ពិន័យអ្នកចូលរួម។

លោក Orban ដែលកំពុងដោះស្រាយបញ្ហាសេដ្ឋកិច្ច និងការប្រជែងមិនធ្លាប់មានពីគណបក្សប្រឆាំងថ្មី នៅមុនការបោះឆ្នោតឆ្នាំ២០២៦ បានរិះគន់សហគមន៍ LGBT ជាយូរមកហើយ៕