ប្រធានាធិបតីម៉ិកស៊ិកលោកស្រី Claudia Sheinbaum បាននិយាយថា រដ្ឋាភិបាលរបស់លោកស្រី បានផ្ញើរលិខិតការទូតមួយច្បាប់ទៅដល់សហរដ្ឋអាមេរិក ដើម្បីព្យាយាមការពារពលរដ្ឋម៉ិកស៊ិកពីការបញ្ជូនទៅកាន់មូលដ្ឋានកងទ័ពជើងទឹកនៅឆកសមុទ្រ Guantanamo ប្រទេសគុយបា ។

លិខិតមួយច្បាប់នេះ ត្រូវបានផ្ញើរ ពេលដែលរដ្ឋបាលរបស់លោកប្រធានាធិបតី Donald Trump ប្រកាសផែនការរបស់ខ្លួនកាលពីខែមុន ក្នុងការបញ្ជូនជនអន្តោប្រវេសន៍ទៅកាន់ឆកសមុទ្រ Guantanamo ជាមូលដ្ឋានឈរជើងរបស់កងទ័ពជើងទឹកសហរដ្ឋអាមេរិកស្ថិតនៅលើកោះសមុទ្រការ៉ាអ៊ីប ។

លោកស្រី Sheinbaum និយាយថា ម៉ិកស៊ិក បានស្នើសុំផងដែរថា ពលរដ្ឋរបស់ពួកយើងទាំងអស់ដែលត្រូវនិរទេសចេញពីសហរដ្ឋអាមេរិក ត្រូវតែបញ្ជូនទៅកាន់ម៉ិកស៊ិក មិនមែនប្រទេសផ្សេងទៀតនោះទេ ។

សេចក្តីអត្ថាធិប្បាយរបស់លោកស្រី Sheinbaum បានកើតមានឡើង ក្រោយរដ្ឋបាលលោក Trump បាននិរទេសសមាជិកក្រុមជនអន្ធពាលចោទប្រកាន់វ៉េណេស៊ុយអេឡា Tren de Aragua ជាង ២០០នាក់ ទៅកាន់ប្រទេសអែល សាល់វ៉ាឌ័រ កាលពីចុងសប្តាហ៍កន្លងទៅ បើទោះបីជាបទបញ្ជាពីតុលាការហាមប្រាមការធ្វើបែបហ្នឹងក៏ដោយ ៕