ឯកអគ្គរដ្ឋទូតស្តីទីសហរដ្ឋអាមេរិកប្រចាំនៅអង្គការសហប្រជាជាតិ(UN)អ្នកស្រី Dorothy Shea និយាយថា ទំនួលខុសត្រូវសម្រាប់ការចាប់ផ្តើមអរិភាពឡើងវិញនៅតំបន់ហ្កាហ្សា ធ្លាក់លើក្រុមហាម៉ាស់តែម្នាក់ឯងគត់ ហើយសហរដ្ឋអាមេរិកគាំទ្រអ៊ីស្រាអែល នៅក្នុងជំហានបន្ទាប់របស់ពួកគេ ។

អ្នកស្រី Shea បានធ្វើសេចក្តីថ្លែងការណ៍បែបនេះ ទៅកាន់ក្រុមប្រឹក្សាសន្តិសុខ UN ក្រោយក្រុមអាជ្ញាធរសុខភាពប៉ាឡេស្ទីន និយាយថា ការវាយប្រហារតាមច្រកអាកាសរបស់អ៊ីស្រាអែល បានសម្លាប់មនុស្សជាង ៤០០នាក់ ។

អ្នកស្រីនិយាយថា ការស្តីបន្ទោសសម្រាប់ការចាប់ផ្តើមឡើងវិញអរិភាព គឺក្រុមហាម៉ាស់មួយគត់ ដោយសារក្រុមមួយនេះ បដិសេធន៍រាល់សំណើ និងឱសានវាទ ដើម្បីបន្តបទឈប់បាញ់ និងអនុញ្ញាតពេលវេលាសម្រាប់ការចរចាលើគម្រោងបទឈប់បាញ់អចិន្រ្តៃយ៍ ។

អ្នកស្រី Shea បន្តថា ប្រធានាធិបតីសហរដ្ឋអាមេរិកលោក Donald Trump បានបញ្ជាក់យ៉ាងច្បាស់ថា ក្រុមហាម៉ាស់ត្រូវតែដោះលែងចំណាប់ថ្នូរដែលពួកគេឃុំខ្លួនជាបន្ទាន់ ឬបើពុំដូច្នោះទេ ពួកគេនឹងសងការខូចខាត ។

អ្នកស្រីបានធ្វើការច្រានចោលចំពោះការចោទប្រកាន់ថា កងកម្លាំងការពារអ៊ីស្រាអែល(IDF) បានបើកការវាយប្រហាររើសអើងជាតិសាសន៍ ។

អ្នកស្រី Shea និយាយថា IDF បើកការវាយប្រហារលើទីតាំងរបស់ក្រុមហាម៉ាស់ ។ គេដឹងច្បាស់ថា ក្រុមហាម៉ាស់នៅតែបន្តប្រើប្រាស់រចនាសម្ព័ន្ធស៊ីវិល ជាទីតាំងវាយប្រហាររបស់ពួកគេ ហើយសហរដ្ឋអាមេរិកសូមធ្វើការថ្កោលទោសចំពោះសកម្មភាពបែបនេះ ដូចគ្នានឹងប្រទេសផ្សេងទៀតដែរ ។

ខណៈពេលនោះដែរ ឯកអគ្គរដ្ឋទូតរងរុស្ស៊ីប្រចាំនៅ UN លោក Dmitry Polyanskiy បានផ្តោតសំខាន់លើស្ថានភាពមនុស្សធម៌ដ៏ធ្ងន់ធ្ងរនៅតំបន់ហ្កាហ្សា ដោយលោកបានបង្ហាញក្តីរន្ធត់ជាខ្លាំងចំពោះការកើនឡើងអំពើហិង្សា និងចំនួនមនុស្សស្លាប់ដ៏ច្រើនរបស់ជនស៊ីវិល ៕