ប្រធានាធិបតីសាធារណរដ្ឋប្រជាធិបតេយ្យកុងហ្គោលោក Felix Tshisekedi និងសមភាគីរ៉្វាន់ដាលោក Paul Kagame បានចូលរួមកិច្ចប្រជុំទល់មុខគ្នាកាលពីថ្ងៃអង្គារ ដោយមានការសម្របសម្រួលពីព្រះចៅមហាម៉ាត់កាតា ដើម្បីលើកឡើងពីជម្លោះនៅតំបន់ភាគខាងកើតកុងហ្គោ ។ នេះបើយោងតាមការអះអាងរបស់រដ្ឋាភិបាលទាំង ៣បានឲ្យដឹងនៅថ្ងៃនេះ ។

លោក Tshisekedi និងលោក Kagame បានជាប់គាំងក្នុងសង្រ្គាមពាក្យសម្តី ជុំវិញការឈ្លានពានរបស់ក្រុមឧទ្ទាម M23 គាំទ្រដោយរ៉្វាន់ដា ដែលបានរឹបអូសការគ្រប់គ្រងទីក្រុងធំៗបំផុតចំនួន ២នៅតំបន់ភាគខាងកើតរបស់កុងហ្គោ ចាប់តាំងពីខែមករារហូតមក ។

ពួកគេបាននិយាយនៅក្នុងសេចក្តីថ្លែងការណ៍រួមដែលត្រូវបានមើលឃើញដោយទីភ្នាក់ងារព័ត៌មានរ៉យទ័រថា ប្រមុខរដ្ឋទាំង ២ បានយល់ព្រមលើតម្រូវការបន្តកិច្ចពិភាក្សាដែលត្រូវបានផ្តួចផ្តើមឡើងនៅក្នុងទីក្រុង Doha ដើម្បីបង្កើតគ្រឹះដ៏រឹងមាំ សម្រាប់សន្តិភាពជារៀងរហូត ។

អង្គការសហប្រជាជាតិ និងប្រទេសមហាអំណាចពិភពលោក បានចោតប្រកាន់ប្រទេសរ៉្វាន់ដាថា ពួកគេបានផ្តល់អាវុធ និងគាំទ្រក្រុមឧទ្ទាម M23 ដឹកនាំដោយជនជាតិភាគតិច Tutsi ដែលបានធ្វើសង្រ្គាមនៅតំបន់ភាគខាងកើតកុងហ្គោអស់រយៈពេលជាង ២ទសវត្សរ៍មកហើយ ។ ប្រទេសរ៉ា្វន់ដា បានច្រានចោលការប្រកាន់ទាំងអស់នេះ ដោយពួកគេនិយាយថា ពួកគេធ្វើ ដើម្បីស្វ័យការពារប៉ុណ្ណោះ ប្រឆាំងជាមួយកងទ័ពកុងហ្គោ និងអរិភាពរបស់ក្រុមជីវពលមកលើទីក្រុង Kigali ៕