មនុស្សយ៉ាងហោច ១៥នាក់ រួមទាំងកម្មករជំនួយបរទេសម្នាក់ផងដែរ ត្រូវបានសម្លាប់នៅក្នុងការវាយប្រហារតាមច្រកអាកាសរបស់អ៊ីស្រាអែលលើតំបន់ហ្កាហ្សាកាលពីយប់កន្លងទៅ ។

ការវាយប្រហារនៅពេលព្រឹកទាបភ្លឺរបស់អ៊ីស្រាអែលមានគោលដៅលើទីក្រុង Khan Younis និងទីក្រុង Rafah ស្ថិតនៅភាគខាងត្បូងតំបន់ហ្កាហ្សា ក៏ដូចជាសង្កាត់ Sabra ស្ថិតក្នុងទីក្រុងភាគខាងជើងហ្កាហ្សា ។ ជំរំសំពត់តង់ដែលផ្តល់ជាទីជម្រកដល់ជនភៀសខ្លួនប៉ាឡេស្ទីន បានក្លាយជាគោលដៅវាយប្រហារផងដែរ ដោយបានសម្លាប់ស្រ្តីជាម្តាយម្នាក់ និងកូនរបស់គាត់ម្នាក់ ។

កងទ័ពអ៊ីស្រាអែល និយាយនៅក្នុងសេចក្តីថ្លែងការណ៍ថា ពួកគេបើកការវាយប្រហារលើគោលដៅរបស់ក្រុមហាម៉ាស់នៅតំបន់ភាគខាងជើងហ្កាហ្សា កាលពីយប់កន្លងទៅ ។

នៅថ្ងៃពុធនេះ ក្រសួងសុខាភិបាលប៉ាឡេស្ទីន និយាយថា កម្មករជំនួយបរទេសម្នាក់ ត្រូវបានសម្លាប់ និងមនុស្ស ៥នាក់ផ្សេងទៀត បានរងរបួស នៅក្នុងការវាយប្រហាររបស់អ៊ីស្រាអែលដែលមានគោលដៅលើតំបន់ភាគកណ្តាលហ្កាហ្សា ។

ការវាយប្រហារនេះដែរ បានកើតមានឡើង ក្រោយជនប៉ាឡេស្ទីនយ៉ាងហោច ៤០៤នាក់ ត្រូវបានសម្លាប់ ដែលភាគច្រើននៃពួកគេគឺជាក្មេងៗ ពេលដែលអ៊ីស្រាអែលចាប់ផ្តើមទម្លាក់គ្រាប់បែកឡើងវិញលើតំបន់ហ្កាហ្សាកាលពីថ្ងៃអង្គារ ៕