ប្រធានាធិបតីអាមេរិកលោក Donald Trump បានលើកឡើងនូវអ្វីដែលលោកបានហៅថាជាការពិភាក្សាដ៏ល្អក្នុងការសន្ទនាតាមទូរស័ព្ទរយៈពេលមួយម៉ោង ជាមួយសមភាគីអ៊ុយក្រែនលោក Volodymyr Zelensky មួយថ្ងៃបន្ទាប់ពីនិយាយជាមួយប្រធានាធិបតីរុស្ស៊ីលោក Vladimir Putin ។

ដោយសរសេរនៅលើវេទិកាប្រព័ន្ធផ្សព្វផ្សាយសង្គម Truth Social លោក Trump បាននិយាយថា ការសន្ទនានេះគឺមានគោលបំណងធ្វើតាមមសំណើ និងតម្រូវការរបស់អ៊ុយក្រែន និងរុស្ស៊ី ដោយបន្ថែមថាកិច្ចខិតខំប្រឹងប្រែងបទឈប់បាញ់កំពុងដំណើរការ។

លោក Zelensky បានហៅការសន្ទនារបស់លោកជាមួយលោកTrump ថាជា "វិជ្ជមាន" "ដោយស្មោះត្រង់" និង "មានសារៈសំខាន់" ។

លោកបានសរសេរនៅលើបណ្ដាញសង្គម X ថា អ៊ុយក្រែនជឿថាការរួមគ្នាជាមួយអាមេរិក ជាមួយប្រធានាធិបតីលោក Trump និងក្រោមការដឹកនាំរបស់អាមេរិក សន្តិភាពយូរអង្វែងអាចសម្រេចបាននៅឆ្នាំនេះ ។

ទាំង Zelensky និងទាំងលោកPutin បាននិយាយថាលោកទាំងពីរនឹងយល់ព្រមបញ្ឈប់ការវាយប្រហារលើហេដ្ឋារចនាសម្ព័ន្ធថាមពល។ ទោះយ៉ាងណាក៏ដោយ ចាប់តាំងពីពេលនោះមក មេដឹកនាំទាំងពីរបានចោទប្រកាន់គ្នាទៅវិញទៅមក ពីការបន្តវាយប្រហារនានាក្រៅសមរភូមិ។

លោកTrump និងលោកPutin បានព្រមព្រៀងគ្នាកាលពីថ្ងៃអង្គារ១៨មីនា លើការបញ្ឈប់ការវាយប្រហាររបស់រុស្ស៊ីដាក់គោលដៅលើថាមពលរបស់អ៊ុយក្រែន ប៉ុន្តែពុំមានការធានាបទឈប់បាញ់ពេញលេញទេ ក្នុងជំនួបតាមទូរស័ព្ទនោះ។ មេដឹកនាំអាមេរិក និងរុស្ស៊ី បានពិភាក្សាគ្នាជាងមួយម៉ោងកន្លះ ហើយលោកទាំងពីរបានសម្តែងក្តីសង្ឃឹមក្នុងការផ្សះផ្សាទំនាក់ទំនងរវាងប្រទេសទាំងពីរ៕