ប្រធានាធិបតីអាមេរិក លោក Donald Trump នឹងចុះហត្ថលេខាលើក្រឹត្យមួយដែលរំពឹងទុកជាយូរមកហើយនៅថ្ងៃព្រហស្បតិ៍ (២០ មីនា) នេះ ដែលមានគោលបំណងបិទក្រសួងអប់រំអាមេរិក ដោយចាត់វិធានការលើការសន្យាយុទ្ធនាការដ៏សំខាន់មួយ នេះបើយោងតាមសេចក្តីសង្ខេបរបស់សេតវិមាន មើលឃើញដោយសារព័ត៌មានរ៉យទ័រ។

ចំណាត់ការនេះត្រូវបានតតាំងរួចមកហើយដោយក្រុមផ្លូវច្បាប់របស់បណ្ដារដ្ឋឈរខាងបក្សប្រជាធិបតេយ្យ ដែលបានដាក់ពាក្យបណ្ដឹងរារាំងលោក Trump មិនឱ្យរុះរើក្រសួងអប់រំ និងបញ្ឈប់ការបណ្ដេញបុគ្គលិកជិតពាក់កណ្តាលនៃកម្លាំងពលកម្មរបស់ខ្លួន ដែលបានប្រកាសកាលពីសប្តាហ៍មុន។

លោក Trump និងទីប្រឹក្សាមហាសេដ្ឋីរបស់ខ្លួនគឺលោក Elon Musk បានព្យាយាមបិទកម្មវិធី និងស្ថាប័នរដ្ឋាភិបាលជាច្រើន ដូចជាទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ USAID ជាដើមដោយមិនមានការយល់ព្រមពីសភា ប៉ុន្តែការលុបចោលក្រសួងអប់រំនេះនឹងក្លាយជាការប៉ុនប៉ងលើកដំបូងរបស់លោក Trump ក្នុងការបិទទីភ្នាក់ងារកម្រិតគណៈរដ្ឋមន្ត្រី។

លោក Trump មិនអាចបិទក្រសួងអប់រំដោយពុំមានការអនុម័តពីសភាបានទេ ដែលនេះអាចជាជំហានដ៏ពិបាក។ សមាជិកបក្សសាធារណរដ្ឋរបស់លោក Trump ទទួលបានសំឡេងភាគច្រើន ៥៣ ទល់នឹង៤៧ នៅក្នុងព្រឹទ្ធសភា ប៉ុន្តែច្បាប់សំខាន់ៗដូចជា សំណើលុបបំបាត់ភ្នាក់ងារកម្រិតគណៈរដ្ឋមន្ត្រីបែបនេះនឹងត្រូវការ ៦០សំឡេង ហើយដូច្នេះនឹងត្រូវការការគាំទ្រពីអ្នកប្រជាធិបតេយ្យបន្ថែម ខណៈអ្នកទាំងនោះហាក់មិនគាំទ្រលើជំហាននេះទេ៕