យោធាកូរ៉េខាងត្បូងបាននិយាយនៅថ្ងៃព្រហស្បតិ៍២០មីនាសប្ដាហ៍នេះថា កូរ៉េខាងត្បូង និងសហរដ្ឋអាមេរិកបានបិទបញ្ចប់សមយុទ្ធយោធារួមប្រចាំឆ្នាំដ៏សំខាន់មួយក្នុងគោលបំណងពង្រឹងសមត្ថភាពការពាររបស់ពួកគេប្រឆាំងការគំរាមកំហែងផ្នែកយោធារបស់កូរ៉េខាងជើងនៅថ្ងៃព្រហស្បតិ៍នេះ។

លំហាត់ហ្វឹកហ្វឺនមានឈ្មោះថា ខែលសេរីភាព(Freedom Shield) ដែលប្រដូចទៅនឹងការពិត បានឈានដល់ទីបញ្ចប់ បន្ទាប់ពីដំណើរការរយៈពេល១១ ថ្ងៃ នៅចំពោះមុខការវិវត្តន៍នៃការគំរាមកំហែងដោយនុយក្លេអ៊ែរ និងមីស៊ីលើរបស់កូរ៉េខាងជើង និងការពង្រឹងកិច្ចសហប្រតិបត្តិការយោធាជាមួយរុស្ស៊ី។

សមយុទ្ធឆ្នាំនេះ គឺជាការហ្វឹកហាត់ផ្នែកយោធាដ៏ធំលើកដំបូងរបស់សម្ព័ន្ធភាពនេះ ចាប់តាំងពីប្រធានាធិបតីអាមេរិក លោក Donald Trump វិលកាន់អំណាចជាថ្មីកាលពីថ្ងៃទី២០ខែមករា ដោយយោធាអាមេរិក បានអះអាងជាថ្មីនូវការប្តេជ្ញាចិត្តផ្នែកសន្តិសុខរបស់ខ្លួនចំពោះកូរ៉េខាងត្បូង។

អគ្គសេនាធិការចម្រុះរបស់កូរ៉េខាងត្បូង (JCS) បាននិយាយថា សម្រាប់សមយុទ្ធឆ្នាំនេះ កូរ៉េខាងត្បូងបានដាក់ពង្រាយទាហានប្រហែល១៩.០០០នាក់ ហើយសម្ព័ន្ធភាពនេះ បានរៀបចំសមយុទ្ធនៅលើទីលានដើម្បីបង្កើនអន្តរប្រតិបត្តិការរបស់ពួកគេ។

សមយុទ្ធនេះផ្ដោតលើសកម្មភាពនៅលើដីគោក ក្នុងសមុទ្រ ប្រឆាំងចោរព័ត៌មានបច្ចេកវិទ្យា និងសន្តិសុខដែនអាកាស និងដែនអវកាស ដោយមានបញ្ជាការយុទ្ធសាស្ត្រ និងបញ្ជាការកងនាវាចរកងទ័ពជើងទឹករបស់កូរ៉េខាងត្បូង ចូលរួមសមយុទ្ធរួមគ្នាជាលើកដំបូង៕