និវត្តន៍ជន សមាជិកសហជីព និងអ្នកតំណាងអង្គការស៊ីវិល រាប់ពាន់នាក់ បានចេញតវ៉ាកាលពីថ្ងៃពុធ នៅខាងមុខសភាប្រទេសអាហ្សង់ទីន ដោយមានសន្តិសុខយ៉ាងតឹងរ៉ឹង បន្ទាប់ពីព្រឹត្តិការណ៍ដ៏ហិង្សាកាលពីសប្តាហ៍មុន នៅទីក្រុង Buenos Aires ។ ការតវ៉ាប្រចាំសប្តាហ៍ធ្វើឡើងដោយនិវត្តន៍ជនអាហ្សង់ទីន ត្រូវបានគាំទ្រដោយសមាជិកសហជីព និងអង្គការស៊ីវិល ដោយបានអំពាវនាវឱ្យបញ្ចប់ការកាត់បន្ថយថវិកា និងធ្វើឲ្យប្រសើរលក្ខខណ្ឌចូលនិវត្តន៍របស់ប្រធានាធិបតី លោក Javier Milei ។

យោងតាមប្រព័ន្ធផ្សព្វផ្សាយក្នុងស្រុកបានឱ្យដឹងថា ក្រុមអ្នកតវ៉ាបានចូលមកដល់ខាងមុខសភាដែលមានការយាមកាមយ៉ាងតឹងរ៉ឹង ដោយមានមន្ត្រីនគបាលជាង២.០០០នាក់ ត្រូវបានដាក់ពង្រាយដើម្បីបិទផ្លូវ និងធានាបានការមិនឲ្យប្រមូលផ្ទុំគ្នា ដោយរឹតបន្តឹងការចូល។ រដ្ឋមន្ត្រីក្រសួងសន្តិសុខ លោក Patricia Bullrich បានចែករំលែកវីដេអូនៅលើបណ្តាញ X ដោយមន្ត្រីនគរបាលព្រមានថា កងកម្លាំងសន្តិសុខនឹងឆ្លើយតប ប្រសិនបើមានអំពើហិង្សាណាមួយកើតឡើង។

បាតុកម្មកាលពីថ្ងៃទី១២ ខែមីនា ត្រូវបានឃើញមានការចូលរួមពីក្រុមអ្នកគាំទ្របាល់ទាត់ បានបញ្ចប់ដោយការទប់ស្កាត់ពីសំណាក់នគរបាលបង្ក្រាបកុបកម្ម ដែលបានដាក់ពង្រាយឧស្ម័នបង្ហៀរទឹកភ្នែក និងកាណុងបាញ់ទឹក មានការចាប់ខ្លួនមនុស្សរាប់រយនាក់ និងមានអ្នករងរបួសច្រើននាក់ ខណៈត្រូវបានរាយការណ៍ដោយប្រព័ន្ធផ្សព្វផ្សាយក្នុងស្រុក។

ជាមួយគ្នានេះ សភាជាន់ទាបប្រទេសអាហ្សង់ទីន បានអនុម័តកិច្ចព្រមព្រៀងថ្មីមួយដ៏មានសក្តានុពលជាមួយមូលនិធិរូបិយវត្ថុអន្តរជាតិ (IMF) កាលពីថ្ងៃពុធ ជាជំហានដ៏សំខាន់ឆ្ពោះទៅរកការធានាបានការគាំទ្រផ្នែកហិរញ្ញវត្ថុសម្រាប់ប្រទេសនេះ។