ក្នុងឱកាសអញ្ជើញជាអធិបតីដ៏ខ្ពង់ខ្ពសក្នុងពិធីបិទ «សន្និបាតបូកសរុបលទ្ធផលការងារឆ្នាំ ២០២៤ និងលើកទិសដៅការងារឆ្នាំ២០២៥ របស់ក្រសួងមុខងារសាធារណៈ» នៅព្រឹកថ្ងៃទី២០ ខែមីនា ឆ្នាំ២០២៥នេះដែរ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី នៃកម្ពុជា មានប្រសាសន៍បញ្ជាក់ថា សម្ដេចមិនឯកភាពឱ្យពង្រីក ឬបង្កើតគ្រឹះស្ថានសិក្សាថ្មីនៅក្នុងក្រសួង-ស្ថាប័នឡើយ ខណៈមានក្រសួង-ស្ថាប័នមួយចំនួនបានស្នើសុំមកសម្ដេច ចង់បង្កើតគ្រឹះស្ថានសិក្សាបន្ថែម នៅក្នុងក្រសួងរបស់ខ្លួន។

ក្នុងឱកាសនោះសម្ដេចធិបតី នាយករដ្ឋមន្រ្ដី បានមានប្រសាសន៍ថា បច្ចុប្បន្នរាជរដ្ឋាភិបាល​កំពុង​អនុវត្តនូវយុទ្ធសាស្រ្ដបង្រួមកិច្ចការងាររដ្ឋបាលសាធារណៈនៅតាមបណ្ដាក្រសួងស្ថាប័ន គឺមិនមាន​គោលការពង្រីកបន្ថែមឡើយ ​ដូច្នេះចំពោះការស្នើសុំបង្កើតសាលា ឬគ្រឹះស្ថានសិក្សាថ្មីជាចំណុះ​របស់ក្រសួង គឺនឹងបង្កើនចំនួនមន្រ្ដីផ្ទុយពីគោលនយោបាយដែលរាជរដ្ឋាភិបាលបានដាក់ចេញ។

សម្ដេចធិបតី បានបញ្ជាក់ច្បាស់ៗថា សម្ដេចមិនឯកភាពចំពោះការស្នើសុំរបស់រដ្ឋមន្រ្ដីមួយចំនួន​ដែលចង់បង្កើតគ្រឹះស្ថានសិក្សា ឬសាលារៀនថ្មីជាចំណុះរបស់ក្រសួងឡើយ។ សម្ដេចមានប្រសាសន៍ថា ដូចជាក្រសួងព័ត៌មានដែលចង់បង្កើត​សាលាលើការ​បណ្ដុះបណ្ដាល​លើវិស័យព័ត៌មាន គឺមិនចាំបាច់ឡើយ ខណៈសាលានេះ វិស័យឯកជនមានរួចនៅហើយ គឺសាលាដេប៉ាតេម៉ង់ប្រព័ន្ធផ្សព្វផ្សាយ និងសារគមនាគមន៍ (DMC) ស្ថិតនៅសាកលវិទ្យាល័យ​ភូមិន្ទភ្នំពេញ ដូច្នេះមិនចាំបាច់បង្កើតបន្ថែមទេ។ ចំណែករដ្ឋមន្រ្ដីតាមបណ្ដាក្រសួងស្ថាប័នផ្សេង​ទៀត​ដែលចង់ស្នើសុំបង្កើតគ្រឹះស្ថានសិក្សាឬសាលាដែរនោះ គឺមិនចាំបាច់ស្នើសុំមក​សម្ដេចទៀតឡើយ។

សូមជម្រាបថា បច្ចុប្បន្នមន្ត្រីនៅទូទាំងប្រទេសមានចំនួនសរុប ២៣២,០៣៤ នាក់ (ស្ត្រី ៩៦,៩៦៩នាក់) ស្មើនឹង ១០០% ក្នុងនោះ ថ្នាក់ជាតិ ៥៤,៥៨៥នាក់ (ស្រី ១៦,៦៧៦នាក់) ស្មើនឹង ២៣.៥២% និងថ្នាក់ក្រោមជាតិ ១៧៧,៨៤៩នាក់ (ស្ត្រី ៨១,៣១២នាក់) ស្មើ និង ៧៦.៥៣%។ នេះបើតាមរបាយការណ៍របស់ក្រសួងមុខងារសាធារណៈ៕អត្ថបទ៖ វ៉ន ដារ៉ា