សហភាពអឺរ៉ុប បានបង្ហាញផែនការបង្កើនការចំណាយផ្នែកយោធា ដើម្បីបង្កើនការត្រៀមលក្ខណៈការពារជាតិរបស់ខ្លួន ក្នុងការឆ្លើយតបទៅនឹងការគំរាមកំហែងពីរុស្ស៊ី។ គណៈកម្មការអឺរ៉ុប ជាផ្នែកប្រតិបត្តិរបស់សហភាពអឺរ៉ុប បានចេញផ្សាយសៀវភៅសដំបូងមិនធ្លាប់មានរបស់ខ្លួន សម្រាប់វិស័យការពារជាតិអឺរ៉ុបកាលពីថ្ងៃពុធ។ សៀវភៅនេះ គូសបញ្ជាក់អំពីគោលនយោបាយក្នុងគោលបំណងពង្រឹងសមត្ថភាពការពាររបស់ប្លុកអឺរ៉ុបនៅឆ្នាំ២០៣០ និងការបង្កើតមូលដ្ឋានឧស្សាហកម្ម-យោធា រឹងមាំជាងមុន។

សៀវភៅនេះ បាននិយាយថា ប្រទេសរុស្ស៊ី បានចំណាយរហូតដល់៩ភាគរយនៃផលិតផលក្នុងស្រុកសរុប(GDP) របស់ខ្លួនលើវិស័យការពារជាតិក្នុងឆ្នាំ២០២៤ ខណៈប្រទេសនេះនៅតែបន្តវាយលុកលើអ៊ុយក្រែន និងបាននិយាយថា ទីក្រុងមូស្គូ នឹងបន្តពង្រីកសេដ្ឋកិច្ចសង្រ្គាមរបស់ខ្លួន ហើយរុស្ស៊ីនឹងនៅតែជាការគំរាមកំហែងជាមូលដ្ឋាន ចំពោះសន្តិសុខរបស់អឺរ៉ុប សម្រាប់ពេលអនាគតដ៏ខ្លីខាងមុខ។

សៀវភៅស ទទួលស្គាល់ថា ការវិនិយោគលើវិស័យការពារជាតិរបស់សហភាពអឺរ៉ុប មិនគ្រប់គ្រាន់ជាច្រើនទសវត្សរ៍មកហើយ និងបាននិយាយថា សហរដ្ឋអាមេរិក បាននិងកំពុងជំរុញឱ្យអឺរ៉ុប ទទួលខុសត្រូវបន្ថែមទៀត សម្រាប់វិស័យការពារជាតិរបស់ខ្លួន។

សៀវភៅនេះ ស្នើឱ្យរដ្ឋជាសមាជិកផ្តោតលើវិស័យអាទិភាពចំនួន៧។ វារួមមាន ការការពារដែនអាកាស និងការពារមីស៊ីល ដើម្បីការពារប្រឆាំងការគំរាមកំហែងដូចជា មីស៊ីលស៊ីបគោលដៅ មីស៊ីលBallistic និងមីស៊ីលល្បឿនលឿនជាងសំឡេង និងយានដ្រូន។ សៀវភៅនេះនិយាយផងដែរថា សហភាពអឺរ៉ុបនឹងផ្តល់អាទិភាពដល់ក្រុមហ៊ុនអឺរ៉ុប សម្រាប់ការផ្គត់ផ្គង់រួម ដើម្បីគាំទ្រដល់ឧស្សាហកម្មការពារជាតិរបស់ទ្វីបនេះ។