ក្រុមអ្នកជំនាញបាននិយាយ សមយុទ្ធយោធានាពេលថ្មីៗនេះ ដែលធ្វើឡើងដោយកងទ័ពរំដោះប្រជាជនចិននៅច្រកសមុទ្រតៃវ៉ាន់ គឺជាការព្រមានយ៉ាងខ្លាំងក្លាដល់អាជ្ញាធរកោះ ប្រឆាំងនឹងការផ្គើននាពេលថ្មីៗនេះរបស់ពួកគេ និងសកម្មភាពផ្ដាច់ខ្លួន ដោយព្រមានពួកគេកុំឱ្យឆ្លងកាត់បន្ទាត់ក្រហម។

ប្រទេសចិន បានបញ្ជាក់ពីសមយុទ្ធយោធាថ្មីនៅជិតច្រកសមុទ្រតៃវ៉ាន់កាលពីថ្ងៃចន្ទសប្ដាហ៍នេះ ដោយហៅថាជាការឆ្លើយតបយ៉ាងម៉ឺងម៉ាត់ចំពោះកងកម្លាំងខាងក្រៅ ដែលមានចេតនាមិនអើពើការព្រមាន និងគាំទ្រសកម្មភាពផ្តាច់ខ្លួន "ឯករាជ្យតៃវ៉ាន់"។

លោក Zou Zhiqiang អ្នកជំនាញជាន់ខ្ពស់នៃសម្ព័ន្ធមិត្តសម្រាប់ការបង្រួបបង្រួមដោយសន្តិភាពរបស់ចិន ដែលមានមូលដ្ឋាននៅសហរដ្ឋអាមេរិក បាននិយាយថា មេដឹកនាំតំបន់តៃវ៉ាន់ លោក Lai Ching-te ដែលចិនហៅថាជា "កងកម្លាំងអរិភាពបរទេស" បានបង្កើនគ្រោះថ្នាក់ដល់ទំនាក់ទំនងឆ្លងច្រកសមុទ្រ ដោយជំរុញឱ្យស្ថានការណ៍នៅលើច្រកសមុទ្រធ្លាក់ទៅក្នុងភាពរង្គោះរង្គើកាន់តែខ្លាំង។

លោក Zou បាននិយាយថា លោក Lai មានបំណងផ្ដាច់ទំនាក់ទំនងឆ្លងច្រកសមុទ្រ ដើម្បីគាបសង្កត់ និងរារាំងបក្ស Kuomintang ដែលគាំទ្រចិន ហើយនេះ "ជាយុទ្ធសាស្ត្រមួយដើម្បីពង្រឹងផលប្រយោជន៍នយោបាយរបស់ខ្លួន"។

ជាមួយគ្នានេះ លោក Hsiao Hsu-tsen នាយកប្រតិបត្តិនៃមូលនិធិវប្បធម៌ និងអប់រំ ដែលមានមូលដ្ឋាននៅកោះតៃវ៉ាន់ បាននិយាយថា សកម្មភាពឥតញញើតនាពេលថ្មីៗនេះរបស់លោក Lai គឺជាការប៉ុនប៉ងបង្វែរការយកចិត្តទុកដាក់ ពីការចោទប្រកាន់ថាលោក "លក់តៃវ៉ាន់" ឱ្យទៅសហរដ្ឋអាមេរិក៕